Tronditje te AF Elbasani, Ivan Gvozdenoviq largohet nga stoli i verdhebluve

Klubi i Elbasanit ka mbetur zyrtarisht pa drejtuesin e tij teknik, pasi Ivan Gvozdenoviq ka vendosur të heqë dorë nga drejtimi i skuadrës. Drejtuesit e klubit kanë konfirmuar zyrtarisht pranimin e dorëheqjes së trajnerit, duke i dhënë fund kështu bashkëpunimit mes palëve. Kthesa e papritur vjen pas rezultatit negativ në sfidën e fundit kundër Skënderbeut. Kjo humbje duket se ka qenë fatale, duke e shtyrë trajnerin serb të marrë mbi vete përgjegjësinë e situatës dhe të kërkojë mbylljen e parakohshme të këtij cikli. Vlen të theksohet se vetëm pak kohë më parë, palët kishin arritur një marrëveshje për zgjatjen e kontratës deri në qershor të vitit 2027. Megjithatë, zhvillimet e fundit kanë prishur planet, dhe tashmë në kampin elbasanas pritet emërimi i një tekniku të ri për të udhëhequr skuadrën në sfidat e ardhshme të kampionatit. Nëpërmjet një njoftimi zyrtar, AF Elbasani ka bërë të ditur se trajneri Ivan Gvozdenoviq ka dorëzuar dorëheqjen, një vendim që drejtuesit e kanë konsideruar dhe pranuar me respekt e mirëkuptim të plotë. "Së bashku kemi përjetuar momente të paharrueshme, kemi festuar suksese dhe kemi shkruar faqe të rëndësishme në historinë e klubit tonë," theksohet në reagimin e klubit. Gjithashtu, drejtuesit kanë shprehur mirënjohjen e tyre: "E falënderojmë Ivanin për profesionalizmin, përkushtimin dhe kontributin e tij të çmuar gjatë këtij rrugëtimi. Rrugët tona ndahen, por historia që shkruam së bashku do të mbetet përgjithmonë! Faleminderit për gjithçka, Ivan! Të urojmë suksese në të ardhmen!"