Kontratë miliona dollarëshe: Klienti anonim porosit nga SHBA një variant unik të gjuajtësit F-35

Një blerës ndërkombëtar, identiteti i të cilit mbetet i klasifikuar, ka lidhur një marrëveshje me vlerë 18,8 milionë dollarë me gjigantin amerikan të armatimeve "Lockheed Martin", për krijimin e një modeli të personalizuar të avionit luftarak F-35. Departamenti i Mbrojtjes i Shteteve të Bashkuara zyrtarizoi më 15 tetor se ky investim përfaqëson fazën vijuese të një nisme të dedikuar për zhvillimin, testimin dhe integrimin e pajisjeve të posaçme, sipas kërkesave teknike të vetë klientit. Ky zhvillim bëhet i ditur në buletinin e rregullt të Pentagonit për kontratat ushtarake, ku theksohet se ky ndryshim në marrëveshjen paraprake me "Lockheed Martin Aeronautics", me qendër në Fort Worth të Teksasit, zgjeron ndjeshëm vëllimin e punimeve. Fondet e plota prej 18,8 milionë dollarësh sigurohen tërësisht nga blerësi dhe derdhen në buxhet që në fazën e nënshkrimit të akteve. Ky proces po zhvillohet në kuadër të programit të Shitjeve Ushtarake të Huaja (FMS), i cili përbën mekanizmin zyrtar të Uashingtonit për transferimin e sistemeve të mbrojtjes te partnerët ndërkombëtarë. Si praktikë standarde në raste të caktuara sigurie, autoritetet amerikane zgjedhin të mos e bëjnë publik emrin e shtetit blerës për arsye të ndjeshmërisë strategjike. Plani operacional parashikon që rreth 80 për qind e aktiviteteve prodhuese dhe inxhinierike të zhvillohen në qytetin e Fort Worth, aty ku gjendet kompleksi kryesor i prodhimit të avionëve F-35, ndërsa 20 për qind e mbetur e punës do të shtrihet në qendra të ndryshme anembanë Shteteve të Bashkuara. Sipas afateve të përcaktuara, e gjithë kjo punë kërkimore dhe teknike llogaritet të përmbyllet deri në dhjetor të vitit 2030. Kjo kontratë iu besua kompanisë pa kaluar përmes një procesi tenderimi konkurrues, nga ana e Komandës së Sistemeve Ajrore Detare në Patuxent River, e cila mbikëqyr kontratat për të gjithë programin e F-35. Aktualisht, avioni F-35 ndërtohet në tri variante bazë: F-35A për operacione konvencionale ngritjeje dhe uljeje, F-35B i dizajnuar për ngritje të shkurtër dhe ulje vertikale, si dhe F-35C i përshtatshëm për operimin nga kuverta e aeroplanmbajtëseve. Der më sot, "Lockheed Martin" i ka dorëzuar këto mjete fluturuese për më shumë se dhjetë forca ajrore anembanë botës, ku disa prej shteteve partnere integrojnë pajisjet e tyre të komunikimit, armatimet apo teknologjitë e luftës elektronike mbi platformën amerikane. Rasti më i spikatur i një përshtatjeje të tillë të personalizuar mbetet modeli F-35I Adir i Izraelit, i cili shfrytëzon sisteme avionike të zhvilluara brenda vendit mbi skeletin e modelit bazë F-35A.