Arsyeja e fshehtë: Pse Hansi Flick e largoi nga fusha Lamine Yamalin në triumfin ndaj Betisit

Trajneri i Barcelonës, Hansi Flick, ka qenë i detyruar të sqarojë arsyen e largimit nga fusha të talentit Lamine Yamal, gjatë pjesës së dytë të sfidës ku katalunasit triumfuan 5-2 kundër Real Betisit. Talenti spanjoll pati një nisje ëndrrash në këtë takim, duke gjetur rrugën e rrjetës që në minutën e 10-të me një ekzekutim fantastik, teksa vazhdoi të ishte kërcënimi kryesor për mbrojtjen kundërshtare përgjatë gjithë kohës që qëndroi në fushë. Megjithatë, strategu gjerman vendosi ta zëvendësonte në minutën e 70-të. Shkak për këtë lëvizje u bë kartoni i verdhë që Yamal mori në fraksionin e dytë të lojës, pas një përplasjeje verbale apo fizike me kundërshtarët. Duke parë se Barcelona kishte siguruar një avantazh të sigurt në rezultat, Flick zgjodhi të veprojë me kujdes, duke shmangur çdo rrezik që 19-vjeçari të ndëshkohej sërish dhe të humbiste sfidën e madhe që e pritët skuadrën ndaj Real Madridit. “Kur e zëvendësova Lamine Yamalin, i thashë se isha krenar me të, por me atë rezultat duhej ta bëja zëvendësimin”, u shpreh Flick pas përfundimit të ndeshjes në konferencë për media. Gjatë prononcimit të tij, trajneri nuk i kurseu elozhet për paraqitjen e jashtëzakonshme të anësorit, duke shkuar aq larg sa ta cilësojë atë si futbollistin më të mirë në planet aktualisht. “Lamine shënoi një gol të jashtëzakonshëm. Për mua, në këtë moment, ai është lojtari më i mirë në botë”, përfundoi deklaratën e tij tekniku i gjigantit katalunas.