Formë e shkëlqyer për Florent Hasanin: Sulmuesi kuqezi shkëlqen me dy gola në Turqi

Kayserispori është duke kryesuar me rezultatin 2:1 ndaj Batman Petrolsporit, në kuadër të xhiros së 11-të në Ligën e Parë të futbollit turk. Heroi i deritanishëm i kësaj sfide për skuadrën vendase është sulmuesi Florent Hasani, i cili ka realizuar të dy golat e epërsisë. Futbollisti u hodh në fushë nga stoli me fillimin e pjesës së dytë dhe arriti të lërë menjëherë shenjë në lojë duke gjetur dy herë rrugën e rrjetës. Hasani shënoi fillimisht në minutën e 71-të nga pika e bardhë e penalltisë, ndërsa më pas realizoi edhe golin e dytë në minutën e 82-të të takimit. Falë kësaj dygolëshe, lojtari ka ngjitur kuotën e tij në tre gola të shënuar gjithsej, pas 10 paraqitjeve zyrtare me fanellën e Kayserisporit.