Mbështetja nga SHBA, Berisha: Fjalët e kongresmenëve japin forcë të re protestuesve

Kryetari i Partisë Demokratike, Sali Berisha, ka përcjellë mesazhe falënderimi për dy ligjvënësit amerikanë, Keith Self dhe Robert Aderholt, pas qëndrimeve të tyre në favor të lëvizjes protestuese të të rinjve. Gjatë fjalës së tij, ai vlerësoi se mesazhet e përcjella nga vendimmarrja kryesore e Shteteve të Bashkuara përbëjnë një shtysë të rëndësishme morale për studentët, nxënësit e shkollave të mesme, si dhe për banorët e kryeqytetit dhe të mbarë vendit. Më tej, kreu i opozitës u ndal te qëllimi i kësaj valë protestash dhe aksionesh përmes mosbindjes civile, duke theksuar se ato synojnë shkëputjen përfundimtare nga ajo që ai e ka cilësuar si një qeverisje e bazuar te korrupsioni dhe pushteti i drejtuar nga Edi Rama. “Së pari, duhet të shpreh mirënjohjen time më të thellë kongresmenëve të Kongresit të SHBA, Keith Self, Robert Aderholt për deklaratat e tyre në mbështetje të fuqishme të revoltës studentore, betejës së tyre kundër korrupsionit të niveleve më të larta. Këto deklarata, që vijnë nga tempulli i demokracisë amerikane, janë frymëzim dhe inkurajim për studentët, gjimnazistët, qytetarët e Tiranës dhe mbarë Shqipërisë që në këtë mosbindje civile duan të ndahen përfundimisht nga regjimi i kakistokracisë, narkoshteti i parë dhe i vetëm i Edi Ramës, sistemi kleptokratik i tij”, u shpreh Berisha.