Krizë në prag të ndeshjes me Arsenalin: Bayerni rrezikon të mbetet pa Manuel Neuerin

Kampionët e Gjermanisë, Bayern Munich, po përballen me dilema serioze rreth formacionit para sfidës jetike në Ligën e Kampionëve kundër Arsenalit, pasi pasiguria është shtuar jo vetëm për Jamal Musialën, por edhe për portierin kryesor, Manuel Neuer. Edhe pse fillimisht kishte optimizëm për rikthimin e kapitenit në këtë përballje evropiane, mungesa e tij e vazhdueshme në seancat stërvitore me grupin ka alarmuar drejtuesit dhe stafin teknik të gjigantit bavarez. Guardiani veteran ka qenë jashtë fushave edhe në suksesin e thellë 6-1 kundër RB Leipzigut, si dhe në barazimin 3-3 ndaj Vikingut, ndërsa situata e tij shëndetësore vazhdon të mbahet nën vëzhgim të rreptë. Drejtori sportiv i klubit, Max Eberl, ka dhënë shpjegime zyrtare për gjendjen e portierit, duke bërë me dije se bëhet fjalë për një grumbullim lëngjesh në zonën e këmbës. “Është thjesht pak lëng në këmbë. Nuk ishte e mjaftueshme që ai të luante sot. Do të shohim nëse do të jetë mjaftueshëm mirë për të mërkurën”, ka u shpreh funksionari i klubit gjerman. Aktualisht, Neuer po i nënshtrohet vetëm ushtrimeve individuale brenda ambienteve të qendrës stërvitore “Sabener Strasse”, ndaj prania e tij në fushë ndaj londinezëve mbetet ende enigmë. Nëse kapiteni nuk arrin të rikuperohet në kohë rekord, vendin e tij në portë pritet ta ruajë sërish 23-vjeçari Jonas Urbig, i cili e ka mbuluar këtë repart në takimet e fundit. “Përpiqem të hyj në ndeshje me emocione pozitive. Ndihem shumë mungesë... Duam të jemi gati, në mënyrë që trajneri të ketë mundësinë të vendosë se kush do të luajë. Shpresoj që Manu të rikthehet së shpejti. Unë do të jem aty sa herë që të jem i nevojshëm”, ka deklaruar portieri i ri. Megjithatë, problemet fizike nuk ndalen me kaq për gjermanët, pasi konfirmimi zyrtar ka ardhur edhe për mungesën e sigurt të Jamal Musialës. Talenti i mesfushës ofensive do të jetë spektator ndaj Arsenalit, pasi ai vijon ende procesin e rehabilitimit pas dëmtimit muskulor në kofshën e djathtë, lëndim ky i pësuar rreth tri javë më parë. Sipas drejtorit Max Eberl, ritmi i kësaj përballjeje evropiane vjen tepër shpejt për fazën aktuale të rikuperimit të Musialës, duke kërkuar një rikthim të kujdesshëm dhe hap pas hapi. “Nuk mendoj se do të jetë gati kundër Arsenalit. Ai do të rikthehet gradualisht, por do të jetë sërish në dispozicion gjatë tetorit”, shtoi zyrtari i Bayernit. Në këtë mënyrë, shtabi teknik i bavarezëve mbetet me sytë nga Neueri për ta siguruar atë për këtë përplasje të madhe kontinentale, ndërkohë që është i vetëdijshëm se do t'i duhet të bëjë pa shërbimet e Musialës.