Diaspora dhe qytetarët bashkohen sërish: Valë protestash në Evropë dhe në Prishtinë në mbrojtje të çlirimtarëve

Mërgimtarët tanë në vende të ndryshme të Evropës janë organizuar për të mbajtur sot tubime protestuese në kuadër të nismës “Jo në emrin tim”. Këto protesta vijnë si shenjë mbështetjeje të fuqishme për ish-krerët e Ushtrisë Çlirimtare të Kosovës dhe kundër vendimit të Gjykatës Speciale në Hagë. Sipas paralajmërimeve, manifestimet do të zhvillohen në disa qendra evropiane dhe rajonale, përfshirë Londrën, Oslon, Gjenevën, Trevizon, Lindaun dhe Shkupin. Në kryeqytetin e Maqedonisë së Veriut, tubimi do të zhvillohet në sheshin “Skënderbeu” duke filluar nga ora 14:00. Ndërkohë, në Londër qytetarët do të mblidhen në Richmond Terrace nga ora 15:00 deri në 18:00, kurse në Oslo të Norvegjisë protesta është caktuar nga ora 13:00 deri në 14:00 te Eidsvolls Plass. Në rrafshin vendor, vala e pakënaqësisë vazhdon edhe në kryeqytetin e Kosovës. Sonte në mbrëmje, duke filluar nga ora 21:00, qytetarët do të mblidhen sërish në sheshin “Skënderbeu” në Prishtinë. Kjo shënon natën e dymbëdhjetë me radhë të protestës “Jo në emret tonë”, e cila kundërshton aktgjykimin dënues të shpallur nga Gjykata Speciale. Të gjithë të interesuarit ftohen të bëhen pjesë e këtyre aktiviteteve për të shprehur solidaritetin dhe pakënaqësinë ndaj zhvillimeve aktuale juridike.