Akuzat e bujshme të Zafir Berishës në 2016: Çfarë deklaronte për lidhjet e dyshuara të Hashim Thaçit me shërbimet e huaja

Në vitin 2016, ish-deputeti i Kuvendit të Kosovës, Zafir Berisha, hodhi akuza të forta ndaj ish-presidentit Hashim Thaçi, duke ngritur hapur dyshime rreth një bashkëpunimi të mundshëm të këtij të fundit me shërbimin sekret francez. Gjatë një paraqitjeje televizive në atë kohë, Berisha iu referua deklaratave publike të ish-zyrtarëve të lartë të inteligjencës franceze, të cilët sipas tij e kishin cilësuar Thaçin si bashkëpunëtor të tyre. Kur u vu para pyetjes nëse kishte besim te këto pretendime, ai theksoi se dispononte të dhëna dhe se dyshimet e tij mbështeteshin në fakte. Duke iu përgjigjur pyetjeve në studio, Berisha deklaroi: „Hashim Thaçi, si një njeri i akuzuar me të drejtë nga opinioni publik, asnjëherë nuk është distancuar dhe nuk ka reaguar as pozitivisht dhe as negativisht ndaj një dokumentari ku zyrtarë të lartë të ish-shërbimit sekret francez deklaruan publikisht në media se e kanë pasur bashkëpunëtor.“ Kur u përmend emri i Arnaud Danjean, ai shtoi: „Nëse ka qenë vetëm i Francës, është mirë, por mos ka qenë edhe i ndonjë vendi tjetër përveç Francës. Për Hashimin kam të dhëna, unë dyshoj me fakte, madje tani kam insistuar, në rast se nuk është pika e parë që Hashim Thaçi të shpallet tradhtar i vendit... Unë nuk jam ai që votoj rezoluta koti.“ Në përmbyllje të qëndrimit të tij, ish-deputeti u shpreh me bindje të plotë se opinioni publik do të ndërgjegjësohet me kalimin e kohës: „E them me shumë vetëdije këtë, Hashim Thaçi, herët a vonë ky popull ka me e kuptuar, se gjithë të zezat që po i vijnë këtij vendi, vijnë prej tij dhe ky nuk është ndonjë zbulim epokal.“