Udhëkryqi i aksidenteve në Mitrovicë: Ministria nuk ndërhyn, Komuna pa kompetenca

Publikuar më: Udhëkryqi që lidh lagjet Zhabin, Shipolin dhe Tavnikun në Mitrovicë është kthyer në një nga pikat më të rrezikshme të trafikut në qytet, duke marrë tashmë epitetin “udhëkryqi i aksidenteve”. I pozicionuar në rrugën e Ulqinit, në magjistralen Mitrovicë–Zubin Potok, ky udhëkryq ka shënuar numrin më të madh të aksidenteve në këtë zonë. Banorët dhe drejtuesit e automjeteve kanë kërkuar vazhdimisht ndërhyrje përmes vendosjes së semaforëve apo ndërtimit të një rrethrrotullimi, por deri më tani nuk ka pasur asnjë reagim konkret nga institucionet përgjegjëse. Rruga është nën kompetencë të Ministrisë së Infrastrukturës, por zyrtarët e këtij dikasteri nuk kanë ndërmarrë masa për përmirësimin e sigurisë në këtë nyje të rrezikshme rrugore. Nga ana tjetër, Komuna e Mitrovicës, ndonëse ka shprehur gatishmëri për të ndërhyrë, nuk ka kompetenca ligjore për të realizuar ndonjë investim në këtë segment, për shkak se menaxhimi i tij nuk është në juridiksionin komunal. Ndërkohë, banorët dhe përdoruesit e përditshëm të kësaj rruge vazhdojnë të përballen me rrezik të përhershëm.