Nga “Përtej Vdekjes”: Diktatori Enver Hoxha i shfaqet në ëndërsirë kryeministrit Edi Rama dhe i jep këshilla pushteti

Një vizion surreal duket se ka trazuar ujërat politike, ku diktatori komunist Enver Hoxha dyshohet se i është shfaqur në ëndërr pasardhësit të tij në krye të ekzekutivit, Edi Rama. Në këtë monolog imagjinar, ish-lideri i regjimit shpreh hapur entuziazmin e tij për zhvillimet e fundit në Shqipëri, duke e quajtur Ramën jo thjesht pasardhës, por një vëlla të vërtetë, dhe duke kujtuar metodat e tij të dikurshme të eliminimit të kundërshtarëve politikë në vend, të cilët i dënonte menjëherë pa hezitim. Gjatë këtij rrëfimi të çuditshëm, Hoxha kujton se si e konsolidoi pushtetin përmes luftës së klasave dhe rrjetit të gjerë të spiunëve në çdo familje shqiptare, pushtet të cilin e ruajti deri në frymën e fundit. Më pas, ai përmend trashëgimtarin e tij, Ramiz Alinë, të cilin e akuzon se iu nënshtrua imperializmit amerikan dhe shkatërroi vendin, një fat të ngjashëm që, sipas tij, ia solli Shqipërisë edhe Sali Berisha, njeriu që i rrëzoi bustin në mes të Tiranës dhe e pllakosi shtetin në krizën e vitit 1997. Duke iu drejtuar drejtpërdrejt kreut aktual të qeverisë, Edi Rama, diktatori pranon se fillimisht ka qenë skeptik ndaj lëvizjeve të tij të para, por më vonë e ka kuptuar se gjithçka ka qenë pjesë e një taktike të mirëmenduar. “Po ma kujton veten time,” i thotë ai Ramës në ëndërr, duke shtuar se as vetë nuk do ta menaxhonte më mirë situatën aktuale, pasi armiqve të popullit u duhet treguar me çdo kusht forca e shtetit dhe brutaliteti i duhur. Në këshillat e tij gjeopolitike, ish-lideri i regjimit komunist sugjeron që armiku i jashtëm të lihet anonim, duke qenë se fajësimi i Serbisë do të ishte vetëvrasje politike për shkak të marrëdhënieve vëllazërore që Rama gjoja gëzon me Aleksandër Vuçiqin, ndërsa Rusia tashmë është e angazhuar dhe e sulmuar nga të gjithë për shkak të luftës në Ukrainë. Përballë kësaj situate, ai e porosit Ramën që armikun e brendshëm, të cilin e sheh rrugëve, ta godasë pa dhimbje, të mbushë burgjet dhe të veprojë fiks siç vepronte ai vetë dikur. Në kulmin e këtij monologu halucinant, diktatori shprehet aq i mahnitur nga sjellja e ashër e Ramës ndaj kundërshtarëve sa thotë se ky i fundit ia ka kaluar edhe atij vetë në sadizëm e ashpërsi, duke u shprehur se po të kishte mundësi do ta shpërblente me titullin më të lartë shtetëror, “Hero i Popullit”. Gjithashtu, ai e paralajmëron të ruhet nga joshjet e imperialistëve, duke sjellë ndër mend përplasjet e tij historike me Hrushovin dhe Maon, ku nuk ishte trembur t'ua thoshte troç në sy se kishin devijuar nga rruga e marksizëm-leninizmit. Në fund të këtij takimi onirik, Enver Hoxha i lë një amanet të fundit Edi Ramës: nëse ndonjëherë gjërat i keqësohen dhe ditët i vijnë drejt fundit, t’u drejtohet serbëve, të cilët ai i cilëson “më shumë se vëllezër” dhe të cilët, nëse nuk i ofrojnë ndihmë ushtarake, të paktën do t'i japin strehim, duke e mbyllur me urimin që të korrë atë që ka mbjellë.