Goditje e rëndë për Dinamon e Ferizajt, portieri Leutrim Rexhepi operohet me sukses pas dëmtimit drastik

Portieri i Dinamos së Ferizajt, Leutrim Rexhepi, ka kaluar me sukses operacionin, pasi pësoi një dëmtim të rëndë gjatë ndeshjes kundër skuadrës së Ferizajt, duel ky që e detyroi atë të linte fushën e blertë me autoambulancë për në spital. Pas kontrolleve të hollësishme mjekësore, specialistët konstatuan se bëhej fjalë për një këputje totale të tendinit të Akilit, lëndim ky tejet serioz që kërkoi domosdoshmërisht ndërhyrje kirurgjikale të specializuar, e cila tashmë ka përfunduar me sukses. Përmes një njoftimi zyrtar, FC Dinamo Ferizaj ka falënderuar publikisht Dr. Amir Veselin, i cili sakrifikoi pushimet e tij për t'i ardhur në ndihmë portierit, duke treguar kështu profesionalizëm të lartë në detyrë. Klubi ka adresuar gjithashtu mirënjohje të thellë për familjen e lojtarit, si dhe për zyrtarët e klubit, Gramoz Rushiti dhe Alban Elezi, për kujdesin e vazhdueshëm dhe mbështetjen e palëkundur gjatë këtyre çasteve të vështira. "Në këtë moment të vështirë, i gjithë klubi qëndron pranë Leutrimit, duke i ofruar mbështetjen e plotë në rrugëtimin e tij drejt rikuperimit. Forca, Leutrim! Dinamo është me ty", thuhet ndër të tjera në deklaratën e klubit. Kujtojmë se në sfidën e zhvilluar një ditë më parë, Dinamo u mposht nga Ferizaj me shifrat 4:1, ndërsa në renditjen tabelare gjendet në pozicionin e dytë me 19 pikë të tubuara deri më tani.