Forma e shkëlqyer e Tiranës: Klafuriç lë pas Dinamon e Ilir Dajës dhe gjen stabilitetin në Superiore

Pavarësisht kritikave të marra për paraqitjen e tyre të matur në përballjen ndaj Laçit, futbollistët e Tiranës ia dolën të siguronin tri pikët e plota, duke arritur objektivin kryesor të ndeshjes. Në pesë sfidat e fundit të vlefshme për Abissnet Superiore, skuadra bardheblu ka treguar ekuilibër duke regjistruar tri fitore dhe dy barazime. Statistika pozitive që konfirmojnë formën e mirë, ku vetëm Teuta me pesë fitore radhazi dhe Egnatia me katër fitore e një humbje kanë bërë më mirë gjatë kësaj periudhe. Falë këtij ecurie, trajneri kroat Dean Klafuriç ka kaluar në renditje Dinamon e drejtuar nga Ilir Dajja, e cila në pesë takimet e fundit kampionatore ka numëruar tri fitore dhe dy humbje. Përparimi i kryeqytetasve duket qartë te konsolidimi i një grupi liderësh dhe ngritja e një reparti mbrojtës shumë më të sigurt, duke lënë përfundimisht pas hapat falsë të nisjes së sezonit, ku Tirana u mposht 0-3 nga Egnatia dhe 1-3 nga Teuta në dy javët e para.