Berisha pret delegacionin e Heritage Foundation: Narko-shteti po rrënon vendin, qeveria teknike është domosdoshmëri

Kryetari i Partisë Demokratike, Prof. Dr. Sali Berisha, ka zhvilluar një takim në selinë blu me një delegacion të nivelit të lartë nga Fondacioni prestigjioz amerikan “Heritage Foundation”. Në këtë takim ishin të pranishëm James Carafano, Këshilltar i Lartë i Presidentit për Angazhimet Ndërkombëtare, E.W. Richardson, Mario Enzler, Grace Melton, si dhe Richard e Helen DeVos nga Qendra “Human Flourishing”. Personalitetet amerikane u shoqëruan gjithashtu nga pastori Akil Pano dhe përfaqësues të Fondacionit për Familjen. “Heritage Foundation” njihet gjerësisht si një ndër think-tank-et më me peshë në Washington, i cili ka kontribuar në hartimin e platformave qeverisëse për administratat republikane, duke nisur që nga koha e Presidentit Ronald Reagan e deri te Donald Trump. Gjatë bisedës, kreu i PD-së shprehu mirënjohjen e thellë për mbështetjen e vazhdueshme që ky fondacion i ka dhënë forcës opozitare që nga vitet ’90 e deri më sot, duke vlerësuar lart ndihmën e tyre në ndërtimin e politikave dhe platformave ndër vite, përfshirë edhe programin aktual të partisë. Berisha vlerësoi gjithashtu angazhimin e pastorit Akil Pano dhe Koalicionit për Familjen, ndërsa falënderoi “Heritage Foundation” për qëndrimin e tyre të qartë kundër ideologjisë gjinore dhe pasojave dëmtuese të Ligjit për Barazinë Gjinore. Sipas tij, ky ligj, i mbështetur nga qeveria e drejtuar nga Edi Rama, e ka shndërruar Shqipërinë në një terren eksperimental të ndikimit të George Sorosit. Kreu i demokratëve i njohu miqtë nga SHBA me zhvillimet e fundit, duke u ndalur te protestat e fuqishme studentore kundër korrupsionit, zgjedhjeve të manipuluara dhe fenomenit të narko-shtetit, të cilat ai i cilësoi si ndër më masivet në historinë e deritanishme të vendit, ndërsa rikonfirmoi mbështetjen e plotë të opozitës ndaj kësaj revolte. Në fokus të diskutimeve ishte edhe situata e rënduar politike dhe ekonomike. Berisha theksoi se sfida më e madhe për Shqipërinë, me efekte shkatërruese mbi shtetin e së drejtës dhe shoqërinë, mbetet narko-shteti i instaluar nga Edi Rama, i vetmi i këtij lloji në hapësirën evropiane. Ai solli në vëmendje se Shqipëria është kthyer në pikën kryesore të eksportit të kanabisit dhe korridorit të heroinës për në Evropë, ndërsa kartelet vendase të drogës veprojnë si transportuesit dhe zotërinjtë e tregut të kokainës, duke kontrolluar edhe portet e vendit si hapësira të lira për trafikimin. Më tej, Berisha ngriti shqetësimin se rrjetet e drogës, si në Shqipëri ashtu edhe në Amerikën Latine, kanë lidhje të mirëdokumentuara jo vetëm me strukturat e zbatimit të ligjit si policia, prokuroria dhe gjykatat, por edhe drejtpërdrejt me vetë kreun e ekzekutivit. Ai përmendi se drejtuesi i qeverisë ka pritur në zyrat e tij përfaqësues të kartelit Sinaloa, duke u dhënë leje për kazino dhe resorte luksoze në shkelje të hapur të ligjit. Sipas dosjeve gjyqësore, zyra e kryeministrit dyshohet se ka lehtësuar takime trilaterale në Aruba mes trafikantëve, ndërtuesve dhe emisarëve të tij. Pasojat e këtij modeli qeverisës, sipas kryetarit të PD-së, janë goditëse për ekonominë kombëtare. Euro dhe dollari kanë pësuar zhvlerësimin më të madh në botë në tregun vendas, përkatësisht me 32% dhe 35%, duke tërhequr pas edhe rënien e eksporteve. Të dhënat e Eurostat dëshmojnë se prodhimi industrial ka rënë me 15.3%, ndërkohë që sektori i ndërtimit, i dyshuar si lavatriçe e parave të paligjshme, shënon tregues tri herë më të lartë se mesatarja e Bashkimit Evropian. Në mbyllje, Berisha u ndal te kriza e rëndë demografike që po kalon vendi. Sipas statistikave të Eurostat, gjatë dekadës së fundit vetëm në zonën Schengen kanë emigruar 1,099,000 shtetas, shifër që çon në rreth 47% përqindjen e përgjithshme të shqiptarëve që janë larguar nga vatrat e tyre, ndërsa regjistrat civilë tregojnë se lindjet kanë rënë në kuota të ngjashme me ato të një shekulli më parë, kur popullsia e vendit ishte nën 1 milion banorë.