Dramë në ring: Ermal Hadribeaj pëson humbjen e parë në karrierë në sekondat e fundit ndaj Sebastian Fundora

Boksieri shqiptar Ermal Hadribeaj ka lëshuar nga duart mundësinë e artë për të rrëmbyer titullin prestigjioz të WBC në kategorinë Super Welter, pas një përballjeje dramatike që u vendos në çastet e fundit. Sportisti kuqezi u mposht nga Sebastian Fundora pikërisht në sekondat e fundit të raundit të 12-të, duke u dorëzuar vetëm kur i ndante një hap i vogël nga përfundimi i suksesshëm i duelit ku kishte rezistuar me sukses. Përballja ka qenë jashtëzakonisht e fortë dhe e ekuilibruar, sidomos në pjesën e parë të saj, ku të dy atletët dhuruan spektakël. Hadribeaj u dallua me disa goditje të fuqishme dhe të sakta, ndërsa rivali i tij u kundërpërgjigj me kombinime të shkurtra dhe grushte të shpeshta nga lart. Me kalimin e raundeve, presioni dhe goditjet në trup nga ana e Fundorës rezultuan vendimtare. Në vend që të ruante distancën, ai arriti të depërtonte në zonën ku Hadribeaj preferonte të luftonte, duke ushtruar presion të vazhdueshëm me lëvizje të pandërprera duarsh. Për Ermal Hadribeaj, kjo shënon humbjen e parë në karrierën e tij Profesionale, duke i dhënë fund serisë së tij mbresëlënëse prej 18 fitoresh radhazi në ring.