Kryeministri Rama: Neutralizuam një dron me tritol që synonte goditjen e Kryeministrisë

Në një bashkëbisedim direkt nga zyra e tij paraditen e së dielës, kryeministri i Shqipërisë, Edi Rama, ka deklaruar se trazirat dhe aktet e dhunës që kanë pesë ditë që po përsëriten në Tiranë nuk kanë lidhje me lëvizjen studentore, por janë të organizuara nga opozita vendase dhe qarqe e agjentura të huaja që veprojnë kundër interesave të vendit. Kreu i Qeverisë bëri publike një ngjarje të rëndë, duke zbuluar se dy ditë më parë forcat e sigurisë kanë arritur të neutralizojnë një dron të pajisur me lëshues eksplozivi, i cili kishte për qëllim sulmin ndaj ndërtesës së Kryeministrisë. “Përpara 2 ditësh është neutralizuar një dron më eksploziv që do të godiste Kryeministrinë dike i bënë flakën e oborrit të brendshëm dhe imagjinoni pasojat. S’ka rini dhe s’ka student që i shkon mendja ta bërë në jetë këtë plan, kjo është një dorë e huaj”, u shpreh Rama gjatë fjalës së tij.