Afrimi politik në Gjermani: Si po bashkojnë forcat AfD dhe BSW për Ukrainën dhe Moskën

Parlamenti i landit Saksoni-Anhalt ka miratuar një rezolutë që kërkon ndërprerjen e menjëhershme të çdo ndihme ushtarake dhe financiare nga Gjermania për Ukrainën. Ky vendim u mor gjatë një seance të posaçme, falë votave të përbashkëta të partive Alternativa për Gjermaninë (AfD) dhe Aleanca Sahra Wagenknecht për Arsye dhe Drejtësi (BSW). Të dyja këto forca politike i kanë bërë thirrje kryeministrit aktual të landit, Sven Schulze (CDU), që të ushtrojë ndikimin e tij në Bundesrat – institucioni ku përfaqësohen 16 landet gjermane – për të mbështetur nismat e bisedimeve të paqes me Rusinë. Edhe pse rezoluta nuk pritet të sjellë pasoja të drejtpërdrejta në politikën e jashtme kombëtare të Gjermanisë, pasi landet nuk zotërojnë kompetenca vendimtare në këtë fushë, ajo mbetet një lëvizje me peshë të konsiderueshme politike. Gjatë seancës, deputetja e BSW-së, Claudia Wittig, iu drejtua kreut të ekzekutivit vendor me fjalët: "Është përgjegjësia juaj të angazhoni më në fund për paqe, në çdo mënyrë të mundshme." Nisma në fjalë ka ndezur një valë reagimesh dhe kritikash të forta nga formacionet e tjera politike. Deputeti i CDU-së në parlamentin e landit, Stefan Ruland, e quajti vendimin si një përmbysje të papranueshme të roleve mes agresorit dhe viktimës. "Kushdo që kërkon armëpushim vetëm nga pala e sulmuar nuk kërkon paqe, por kapitullim”, u shpreh ai. Kjo seancë e jashtëzakonshme u zhvillua në një periudhë delikate, ndërkohë që po zhvillohen negociatat për krijimin e qeverisë së re në Saksoni-Anhalt. Ndonëse Alternativa për Gjermaninë (AfD) triumfoj në zgjedhjet e shtatorit 2026 me rreth 44 për qind të votave, ajo nuk mundi të sigurojë shumicën absolute në parlamentin e landit. Për këtë arsye, krijimi i një kabineti qeveritar varet nga bashkëpunimi me partitë e tjera, ndërsa BSW-ja paraqitet si një faktor kyç për të përcaktuar kandidatin e AfD-së për postin e kryeministrit. Në skenën politike vendase, BSW-ja mbetet e vetmja forcë e gatshme të hyjë në bisedime zyrtare për koalicion me AfD-së. Kjo parti e lindur nga krahu i majtë, pavarësisht se e kaloi me vështirësi pragun zgjedhor, luan tashmë një rol qendror. Nga ana tjetër, dega e AfD-së në këtë land etiketohet zyrtarisht si "pjesërisht ekstremiste e konfirmuar e krahut të djathtë”, çka ka shtyrë partiet e tjera tradicionale të shmangin çdo lloj aleance me të. Analistët dhe vëzhguesit e shohin këtë hap të përbashkët si paralajmërimin e një bashkëpunimi më të gjerë e afatgjatë mes dy subjekteve që vijnë nga pole ideologjike të kundërta. Politologu Armin Pfahl-Traughber nga Universiteti i Shkencave Administrative të Aplikuara vë në dukje se pikat e takimit mes tyre përfshijnë kundërshtimin ndaj elitës tradicionale, qëndrimin pro-rus dhe kritikat e ashpra ndaj mbështetjes gjermane për Kievin. Formacioni BSW u themelua në vitin 2024 pas shkëputjes zyrtare nga Partia e Majtë. Themeluesja e saj, Sahra Wagenknecht, ka qenë historikisht një figurë përçarëse në të majtën gjermane, e njohur si përfaqësuesja kryesore e së ashtuquajturës "Platformë Komuniste” me lidhje tradicionale me Moskën. Pikëpamjet e saj konservatore në çështjet shoqërore dhe kritikat ndaj politikës së dyerve të hapura për migracionin sollën ftohje të marrëdhënieve brenda partisë amë, duke e detyruar atë të krijojë një lëvizje të re. Në të njëjtën linjë, figura të shquara të AfD-së kanë shfaqur në vazhdimësi hapur admirim për udhëheqjen e Vladimir Putinit. Ndër shembujt më domethënës është deklarata e vitit 2023 e kryetarit me ndikim të AfD-së në landin e Tyringjisë, Björn Höcke, i cili e cilësoi kreun e Kremlin si "kampionin e botës së shteteve të lira dhe sovrane”, vetëm një vit pas fillimit të sulmit ushtarak rus ndaj Ukrainës. Këto dinamika të reja konfirmohen edhe nga takimet e zhvilluara së fundmi mes drejtuesve të të dyja partive, ku çështjet e sigurisë dhe qëndrimi ndaj lindjes kanë marrë një vëmendje parësore në axhendën e tyre të përbashkët.