Rrëfimi i Maicon: Si Jose Mourinho u përpoq të më merrte me vete te Real Madridi

Ish-mbrojtësi i krahut të Interit, Maicon, ka hedhur dritë mbi prapaskenat e sezonit të jashtëzakonshëm 2009-2010, i cili u kurorëzua me fitimin e tripletës historike për zikaltrit. Gjatë një rrëfimi për “Prime Video”, braziliani ka zbuluar se trajneri Jose Mourinho kishte planifikuar kalimin e tij te Real Madridi që para se të mbyllej sezoni. Pas triumfit madhështor në finalen e Ligës së Kampionëve kundër Bayernit të Mynihut, strategu portugez u largua menjëherë nga Milano për të nisur aventurën në kryeqytetin spanjoll. Megjithatë, ky transferim kishte kohë që po diskutohej mes tyre, siç pranon vetë një nga protagonistët kryesorë të atij brezi të artë të Interit. “E dija shumë mirë situatën, sepse ai dëshironte të më kishte në skuadrën e re”, u shpreh Maicon. “Ne i ruajtëm gjërat mes nesh dhe kjo është arsyeja pse kemi një marrëdhënie kaq të veçantë. Ishte një marrëveshje mes nesh.” Futbollisti ka ndarë një kujtim interesant nga ajo periudhë, duke treguar momentin e thirrjes vendimtare: “Isha nisur për në shtëpi kur ai më telefonoi dhe më tha: ‘Kthehu menjëherë në Appiano Gentile, duhet të flasim.’ Kur u ktheva, ai më tha prerazi: ‘Do të shkojmë te Real Madridi, eja me mua.’ Përgjigja ime ishte: ‘Së pari të fitojmë trofeun, pastaj do të shohim.’ Ai ishte plotësisht i bindur se do t'ia dilnim në finale.” Në fund, Maicon ka theksuar se çdo detaj ishte parashikuar me kujdes nga trajneri, duke përmodur edhe një fakt kurioz: “Gjithçka ishte e planifikuar; nuk është aspak rastësi që seancën e fundit stërvitore para finales së Champions League e zhvilluam në qendrën stërvitore të Real Madridit dhe jo në ‘Santiago Bernabeu’, siç veprohet zakonisht.”