Pamjet nga bulevardi në Tiranë: Nis pastrimi i rrugëve pas orëve të tensionit dhe përplasjeve

Pas disa orësh përballjesh të tensionuara mes forcave të rendit dhe protestuesve, bulevardi kryesor “Dëshmorët e Kombit” në kryeqytet i është kthyer sërish qetësisë. Në terren kanë dalë menjëherë ekipet e pastrimit për të menaxhuar situatën, të cilët janë angazhuar në largimin e sasive të mëdha të gurëve të shkëputur nga trotuaret, që u përdorën si mjete hedhëse gjatë protestës drejt kordonit policor. Në vendngjarje është konstatuar një automjet transporti i mbushur plot me gurë dhe mjete të ndryshme të forta që kishin mbetur në rrugë. Kujtojmë se dita e pestë e tubimeve në Tiranë u karakterizua nga incidente të rënda dhe përleshje fizike, duke lënë pas të lënduar si në radhët e qytetarëve protestues, ashtu edhe mes efektivëve të policisë. Fërkimet më intensive u regjistruan pranë godinës së Kryeministrisë, ku persona me fytyra të mbuluara hodhën drejt policisë lëndë piroteknike, kokteje molotov dhe gurë. Përballë kësaj situate, efektivët ndërhyrën duke përdorur ujëhedhëse dhe gaz lotsjellës për të shpërndarë turmën.