Diaspora shqiptare ngrihet në protestë mbarëeuropiane në mbrojtje të ish-udhëheqësve të UÇK-së

Këtë të diel, më 27 shtator, komuniteti shqiptar në diasporë do të bëhet bashkë përmes një sërë protestash në disa prej qyteteve kryesore të Evropës. Këto tubime organizohen për të shprehur mbështetjen e palëkundur ndaj ish-krerëve të Ushtrisë Çlirimtare të Kosovës dhe për të kundërshtuar vendimet e fundit të Dhomave të Specializuara të Kosovës me seli në Hagë. Nën thirrjen dhe moton “Jo në emrin tim”, qytetarët shqiptarë që jetojnë jashtë vendit janë ftuar të dalin në sheshe për të kundërshtuar aktgjykimet e gjykatës ndërkombëtare, duke kërkuar drejtësi dhe duke dëshmuar mirënjohje për kontributin historik të ish-krerëve të UÇK-së. Hartë e këtyre protestave përfshin qendra të rëndësishme evropiane, ku veçohen qytete si Londra, Oslo, Grazi, Gjeneva, Treviso, Karlsruhe, Lindau dhe Shkupi, si dhe paralajmërime për tubime të tjera shtesë. Në kryeqytetin britanik, Londër, mbështetësit do të mblidhen te Richmond Terrace nga ora 15:00 deri në 18:00, kurse në Oslo të Norvegjisë tubimi do të zhvillohet te Eidsvolls Plass prej orës 13:00 deri në 14:00. Sakaq, në qytetin austriak të Grazit, protesta është caktuar të mbahet në Hauptplatz duke nisur nga ora 12:00, ndërsa në Gjenevë të Zvicrës qytetarët do të grumbullohen në Place des Nations duke filluar nga ora 14:00. Zëri i diasporës do të dëgjohet gjithashtu në Itali, në Treviso, ku protesta do të zhvillohet në Piazza delle Istituzioni nga ora 14:30 deri në 18:00. Në Gjermani, në qytetin e Karlsruhe-s, tubimi do të nisë në Marktplatz nga ora 15:00. Axhenda e protestave vazhdon edhe në Lindau të Gjermanisë, ku qytetarët janë thirrur te Altes Rathaus, në Bismarckplatz, prej orës 15:00, si dhe në Shkup, ku sheshi “Skënderbeu” do të bëhet pikënisja e tubimit nga ora 14:00. Po ashtu, në Nurnberg të Gjermanisë, organizatorët kanë bërë të ditur se protesta do të nisë në orën 14:00 nga Kornmarkt, për të vazhduar me aktivitete të ngjashme edhe në ditët në vijim. Cikli i protestave do të kulmojë në fillim të muajit të ardhshëm, ku platforma “Liria ka Emër” ka paralajmëruar një tubim madhështor në Prishtinë, i cili do të mbahet më 1 tetor.