Bilanci i muajit shtator: Mbi 1.800 shoferë të motoçikletave dhe biçikletave ranë pre e kontrolleve policore

Gjatë muajit shtator të këtij viti, aksioni i përforcuar i Ministrisë së Punëve të Brendshme drejt drejtuesve të biçikletave, mopedëve, motoçikletave, triçikletave dhe katërçikletave ka rezultuar me regjistrimin e gjithsej 1.803 kundërvajtjeve në komunikacion, bëjnë të ditur autoritetet policore. Shkelja më e shpeshtë e konstatuar në terren ka qenë mosmbajtja e helmetës mbrojtëse, ku vetëm për këtë arsye janë regjistruar 1.478 raste. Po ashtu, në kuadër të këtyre inspektimeve janë evidentuar edhe 132 raste të veprës penale "drejtim i pakujdesshëm i automjetit motorik", në përputhje me nenin 297-a të Kodit Penal, ndërsa në bazë të nenit 300-b të Kodit Penal janë sekuestruar gjithsej 88 motoçikleta. Krahas këtyre, gjatë kontrolleve janë shqiptuar edhe 5.034 kundërvajtje të llojeve të ndryshme. Sa i përket shpërndarjes gjeografike, numri më i lartë i shkeljeve është regjistruar në territorin e SPB Shkup me 437 raste, i ndjekur nga SPB Manastir me 233, SPB Veles me 213, SPB Strumicë me 201 dhe SPB Tetovë me 168 raste. Njësia Mobile për Sigurinë e Trafikut Rrugor ka konstatuar 154 kundërvajtje, kurse pjesa tjetër i takon rajoneve të SPB Shtip, SPB Ohër dhe SPB Kumanovë. Nga ky dikaster shtetëror theksojnë se për të gjitha parregullsitë e konstatuara janë ndërmarrë masat e parapara ligjore ndaj shkelësve. Ministria e Punëve të Brendshme (MPB) ka bërë të qartë se kontrollet e intensifikuara në trafik do të vijojnë edhe në periudhën në vijim, duke u bërë thirrje publike drejtuesve të mopedëve dhe motoçikletave që të respektojnë rregullat, të përdorin pajisjet e detyrueshme mbrojtëse si kaskën dhe të shmangin çdo lloj sjelljeje të rrezikshme në rrugë, me qëllim parandalimin e aksidenteve dhe rritjen e sigurisë për të gjithë pjesëmarrësit në komunikacion.