Stambolli nis pastrimin pas motit të keq: Banorët dhe bizneset flasin për dëmet e mëdha

Autoritetet turke kanë mobilizuar strukturat e emergjencës për të fshirë gjurmët e lëna nga reshjet e rrëmbyeshme të shiut në Stamboll. Veprimet intensive për pastrimin dhe evakuimin e ujit në rrugën Dereboyu po zhvillohen nën mbikëqyrjen e Drejtorisë së Menaxhimit të Fatkeqësive dhe Emergjencave (AFAD), Komandës së Xhandarmërisë Provinciale të Stambollit, Bashkisë Metropolitane të Stambollit, si dhe asaj të Sarıyer. Në terren, grupet e punës janë angazhuar plotësisht për heqjen e sasive të mëdha të baltës dhe mbeturinave që kanë bllokuar akset rrugore dhe mjetet transportuese. Njëkohësisht, ekipet po japin ndihmën e nevojshme qytetarëve për nxjerrjen e orendive dhe sendeve personale nga banesat e përmbytura. Ercan Sozen, një tregtar në lagjen Ayazaxha, rrëfeu se sapo nisën përmbytjet, u dha urdhër punonjësve të tij që të linin menjëherë ambientet e punës për siguri. Ai shtoi se është hartuar një raport zyrtar mbi dëmet e shkaktuara, duke theksuar se zona mund të përfshihet në projektet e transformimit urban dhe se pajisjet e punishtes do të zhvendosen në një vend tjetër. Nga ana e tij, rrobaqepësi Ayhan Yarlıhan kujtoi se situata kritike nisi rreth orës 17:30 të ditës së rrebeshit. Sipas tij, uji zakonisht ngrihet deri në prag të dyqanit kur mbingarkohen pusetat. Pasi përpjekjet vetjake për të larguar ujin dështuan, ai dhe të tjerët u strehuan në një objekt afër kursit të Kuranit. Yarlıhan shpreh shqetësimin se të gjitha makineritë e tij janë jashtë përdorimi dhe fajësoi për tejmbushjen e përroit një ndërtesë të re në zonë. Edhe Kiraz Annaç, banore e lagjes, përjetoi momente ankthi pasi shtëpia e saj u pushtua nga uji. Ajo tregoi se prej së mërkurës zona ngjasonte me një kënetë dhe pastrimi i banesës përfundoi vetëm një ditë më parë. "Kur mbërritëm te shtëpia dhe hapëm derën, uji vërshoi brenda. U tmerruam. Për fat të mirë, askush nuk u lëndua, por pasuritë tona janë të çmuara. Të gjitha sendet tona janë shkatërruar. Siç mund ta shihni, shtëpia është bosh", u shpreh ajo.