Kujdes nga mashtrimet kibernetike: MPB lëshon alarmin për SMS të rreme në emër të sistemit “Safe City”

Ministria e Punëve të Brendshme u ka bërë thirrje qytetarëve që të tregojnë vigjilencë të lartë, pasi gjatë kohëve të fundit është konstatuar një valë e sulmeve të tipit “phishing”. Këto mashtrime digjitale po realizohen përmes mesazheve mashtruese, postës elektronike, faqeve të ndryshme në internet, aplikacioneve për mobile, si dhe përmes platformave të rrjeteve sociale. Në këto mesazhe të dyshimta, autorët paraqiten rrejshëm në emër të Departamentit të Komunikacionit, duke dërguar njoftime gjoja nga sistemi “Safe City”. Aty përfshihet një link mashtrues përmes të cilit synohet detyrimi i qytetarëve për të paguar gjoba për shkelje trafiku që në realitet nuk ekzistojnë. “Ju bëjmë apel qytetarëve që të jenë të kujdesshëm gjatë përdorimit të internetit, të mos hapin lidhje dhe mesazhe të dyshimta, të mos ndajnë kurrë të dhëna personale si numrat e kartelave bankare, fjalëkalimet ose identifikuesit personalë përmes kanaleve të paautorizuara. Të raportojnë mesazhet e dyshimta pranë institucioneve kompetente ose në bankën përkatëse”, theksojnë nga Ministria e Punëve të Brendshme. Po ashtu, nga ky dikaster sqarojnë se njoftimet e vërteta përmes SMS për kundërvajtjet e konstatuara vijnë ekskluzivisht nga dërguesi i verifikuar “MVR-SC”. Për më tepër, nga MPB bëjnë me dije se çdo njoftim zyrtar për gjoba duhet të përmbajë detyrimisht targën e automjetit që ka bërë shkeljen, si dhe një link zyrtar dhe konkret nga sistemi “Safe City”. Autoritetet e rendit kanë nisur hetimet zyrtare për të zbardhur dhe ndriçuar të gjitha rastet e raportuara të këtyre tentativave mashtruese.