Krizë sociale në Francë: Mbi 80 marshime proteste paralajmërohen në mbarë vendin

Franca po përballet me një valë të gjerë pakënaqësish, pasi qytetarët i janë bashkuar revoltës së nxënësve, të cilët prej më shumë se tri javësh protestojnë për standardin e arsimit dhe kushtet në shkolla. Rritja e kostos së jetesës ka tensionuar situatën në vend. Sipas agjencisë së lajmeve Associated Press (AP), për ditën e shtunë, më 17 tetor, janë thirrur demonstrata kombëtare. Qytetarët po kërkojnë paga dhe pensione më të larta, frenim të çmimeve, si dhe shërbime publike më cilësore për të gjithë. Organizimi vjen pas thirrjeve të shpërndara në rrjetet sociale për ringjalljen e lëvizjes së njohur si “Jelekët e Verdhë”, e cila u formua fillimisht në vitin 2018 si shenjë proteste ndaj pabarazive ekonomike dhe politikave qeveritare. Kjo valë protestash ka fituar edhe mbështetjen e Konfederatës së Përgjithshme të Laborit (CGT), një nga sindikatat më të rëndësishme në vend, e cila kërkon ndryshime rrënjësore ekonomike dhe mbrojtje të sektorit publik. Ministri i Brendshëm i Francës, Laurent Nuñez, ka bërë të ditur se për ditën e nesërme janë planifikuar më shumë se 80 marshime dhe qindra tubime në të gjithë territorin francez, duke përfshirë protesta spontane dhe bllokime të qarkullimit rrugor. Në kryeqytet, marshimi kryesor pritet të nisë në orët e para të pasdites nga Sheshi i Republikës, ndërkohë që autoritetet policore kanë ndaluar disa tubime të tjera në qendër të Parisit. Për arsye sigurie të kërkuara nga policia, stacione të caktuara të metrosë do të mbyllen, sidomos ato pranë bulevardit Champs-Élysées, selisë presidenciale, parlamentit dhe institucioneve të tjera qeveritare. Nga ana e tij, Presidenti i Francës, Emmanuel Macron, u ka bërë thirrje qytetarëve për maturi dhe mbrojtje të pronës publike e private, duke theksuar se e drejta e protestës duhet të shprehet në mënyrë paqësore. Ai ka dëukuar gjithashtu çdo tentativë nga grupe të caktuara për të nxitur dhunë, dëme materiale dhe trazira gjatë zhvillimit të këtyre demonstratave. Ndërkohë, revoltë e nxënësve, e cila ka nisur që në mesin e muajit shtator, është shoqëruar me tensione, bllokim të dyerve të gjimnazeve, arrestime në masë dhe përplasje të ashpra me forcat e rendit. Gjatë javëve të fundit janë shënuar mijëra ndalime policore dhe qindra të lënduar, ndërsa në disa raste institucionet arsimore janë përfshirë nga flakët për shkak të incidenteve. Metodat e përdorura nga policia për shpërndarjen e turmës kanë ngjallur debate dhe kritika të shumta, veçanërisht pas lëndimeve të rënda të disa të miturve gjatë përleshjeve. Ministri Nuñez ka marrë vendimin të pezullojë përdorimin e një tipi të caktuar granatash trullosëse ndaj protestuesve të rinj, pasi një 15-vjeçar humbi njërën nga duart e tij si pasojë e përdorimit të tyre. Protestat e të rinjve kanë marrë edhe mbështetjen e njohur ndërkombëtarisht, ku aktivistja e klimës dhe e drejtësisë sociale, Greta Thunberg, iu bashkua të martën nxënësve të një shkolle të mesme në Saint-Denis, në periferi të Parisit. Tensioni i tanishëm social dhe politik në Francë vjen në një moment delikat, ndërkohë që pakënaqësitë e akumuluara për ekonominë dhe arsimin janë shndërruar në kryefjalën e debatit publik në prag të zgjedhjeve presidenciale.