Kamioni përfshihet nga flakët pas një vetaksidenti në autostradën “Ibrahim Rugova”, flet Policia

Një incident i rëndë trafiku ka ndodhur në autostradën “Ibrahim Rugova”, ku një kamion ka dalë nga rruga dhe si pasojë është përfshirë nga flakët. Ngjarja është regjistruar në segmentin nga Prizreni në drejtim të Prishtinës, konkretisht në territorin e komunës së Malishevës. Lajmin për këtë ngjarje e ka konfirmuar zëdhënësi i Policisë së Kosovës, Bajram Krasniqi, i cili ka bërë të ditur se autoritetet janë njoftuar rreth orës 12:10 për ndodhinë. “Sot rreth orës 12:10, policia është njoftuar për një aksident trafiku, vetaksident, në autostradë, në drejtimin Prizren-Prishtinë, në zonën e Malishevës. Në aksident është përfshirë një kamion, i cili pas aksidentit është përfshirë nga zjarri”, ka deklaruar Krasniqi. Forcat e rendit dhe ekipet e zjarrfikësve kanë mbërritur menjëherë në vendin e ngjarjes. Sipas informacioneve zyrtare, për fat të mirë nuk raportohet për persona të lënduar nga ky incident. Ndërkohë, njësitet kompetente policore janë duke hetuar rrethanat dhe shkaqet që çuan deri te ky vetaksident, ndërsa ende nuk janë dhënë detaje shtesë.