Brukseli vlerëson arritjet e Doganës së Kosovës, theksohet rritja e të hyrave dhe lufta ndaj mashtrimeve

Dogana e Kosovës ka bërë të ditur se Komisioni Evropian ka shprehur vlerësimin pozitiv për të arriturat e këtij institucioni. Kjo u bë e e ditur gjatë takimit të 8-të të Nënkomitetit të Marrëveshjes së Stabilizim-Asociimit (MSA) për Tregti, Industri, Dogana dhe Tatime, i cili u zhvillua më 13 tetor 2026 në Bruksel, me praninë e delegacioneve nga institucionet e Kosovës dhe zyrtarëve të Komisionit Evropian. Në kuadër të bisedimeve për sektorin e doganave, ekzekutivi evropian ka vënë në pah disa zhvillime kyçe, ku përfshihen zgjerimi i shtrirjes së terminaleve doganore publike, zvogëlimi i tarifave për këto terminale, rritja e ndjeshme e të hyrave buxhetore, intensifikimi i luftës kundër mashtrimeve doganore, si dhe ngritja e kapaciteteve të brendshme institucionale. “Komisioni Evropian mirëpriti gjithashtu Planin e përditësuar të Integritetit të Doganës së Kosovës, duke theksuar rëndësinë e zbatimit të plotë të tij. Një vëmendje e veçantë iu kushtua edhe avancimit të mëtejmë dhe zbatimit të procedurave të zhdoganimit paraprak të mallrave të importuara, si një instrument i rëndësishëm për rritjen e efikasitetit dhe lehtësimin e tregtisë”, theksohet në njoftimin zyrtar. Në raportimet e paraqitura për këtë fushë, institucioni evropian nuk ka shënuar sfida apo vërejtje specifike ndaj punës së Doganës së Kosovës, por ka sugjeruar vazhdimësinë e reformave dhe përkushtimin në arritjen e objektivave të përbashkëta të dakorduara. Nga ana e saj, Dogana e Kosovës ka rikonfirmuar vendosmërinë e saj për të vazhduar modernizimin e proceseve, lehtësimin e qarkullimit tregtar ligjor, ngritjen e cilësisë së shërbimeve për sipërmarrjet dhe qytetarët, si dhe përmirësimin e mjeteve të kontrollit për parandalimin e paligjshmërive, konform direktivave dhe standardeve të Bashkimit Evropian. Takimet periodike të Nënkomitetit të MSA-së shërbejnë si një instrument jetik për të matur hapat e bërë para dhe për të shtyrë përpara agjendën e reformave të vendit tonë në rrugën drejt integrimit evropian.