Flakët përfshijnë kamionin në autostradën “Ibrahim Rugova”, Policia jep detajet e para

Një incident i pazakontë ka ndodhur mesditën e sotme në autostradën Prizren–Prishtinë, konkretisht në territorin e Malishevës, ku një kamion është përfshirë nga flakët pasi më parë kishte pësuar një vetëaksident rreth orës 12:10. Lajmin për ngjarjen e ka konfirmuar zëdhënësi i Policisë së Kosovës, Bajram Krasniqi, i cili ka saktësuar se fatmirësisht nuk ka pasur persona të lënduar nga ky incident. Menjëherë pas marrjes së informatës, njësitet e emergjencës dhe autoritetet kompetente janë nisur drejt vendngjarjes. “Rreth orës 12:10, policia është njoftuar për një aksident trafiku (vet-aksident), të ndodhur në autostradë (drejtimi Prizren-Prishtinë, zonë e Malishevës). Në aksident është përfshirë një kamion, i cili pas aksidentit është përfshirë nga zjarri. Nga aksidenti nuk ka persona të lënduar, policia dhe zjarrfikësit janë në vendin e ngjarjes”, ka deklaruar Krasniqi për portalin tonë.