Sjellja raciste e tifozëve kushton shtrenjtë: FIFA dënon Federatën Spanjolle të Futbollit

Kombëtarja e Spanjës, kampione në fuqi e botës, është ndëshkuar nga shtëpia më e madhe e futbollit botëror, FIFA, me një gjobë prej 20,000 dollarësh. Ky vendim ka ardhur si pasojë e thirrjeve fyese dhe raciste të drejtuara ndaj besimtarëve myslimanë nga ana e tifozëve spanjollë gjatë një sfide miqësore kundër Egjiptit, e cila u zhvillua në qytetin e Barcelonës. Sipas njoftimit zyrtar të bërë publik nga FIFA të premten, ky ndëshkim është vulosur gjatë ditëve të fundit nga komisioni i apelit, pasi më parë ishte shqyrtuar nga trupa e përbërë prej tre gjyqtarësh disiplinorë. Incidenti në fjalë ndodhi gjatë takimit të zhvilluar më 31 mars, ndërsa thirrjet e papranueshme u regjistruan konkretisht në minutën e 10-të dhe të 47-të të barazimit pa gola në stadiumin e Espanyolit. Kjo sjellje ngriti një valë reagimesh, ndërkohë që u dënua ashpër edhe nga futbollisti Lamine Yamal, i cili i përket besimit mysliman. Ai i cilësoj këto thirrje si thellësisht mosrespektuese dhe absolutisht të patolerueshme në çdo ambient sportiv apo shoqëror. "Të përdorësh fenë si tallje në fushë të bën të dukesh injorant dhe racist", kishte shkruar Yamal në reagimin e tij pas ndeshjes. Përveç dënimit financiar prej 20,000 dollarësh, institucioni qeverisës i futbollit botëror ka vendosur edhe masa shtesë disiplinore për tifozët, të cilat do të zbatohen në ndeshjen e ardhshme miqësore që Spanja do ta luajë si vendase, takim ky që pritet të zhvillohet në qershor të vitit 2027 ose në mars të vitit 2028. Në të njëjtin vendim, trupa gjykuese e FIFA-s ka vlerësuar gjithashtu reagimin e zyrtarëve spanjollë, të cilët ndërmorën menjëherë hapa parandalues, dolën në një dënim publik të këtyre thirrjeve dhe bashkëpunuan për të identifikuar autorët përgjegjës të këtij incidenti.