Goditje ndaj trafikut të drogës në Gjilan: Vihen në pranga dy persona dhe sekuestrohen mbi 50 kg marihuanë

Operacioni i koduar “MALI”, i zhvilluar pas disa muajsh hetime intensive në bashkëpunim me Prokurorinë Themelore në Gjilan, ka rezultuar me arrestimin e dy personave të dyshuar për trafikim droge dhe sekuestrimin e 53 kilogramëve substancë të dyshuar marihuanë, vlera e së cilës në tregun vendas llogaritet rreth 80 mijë euro. Sipas informacioneve zyrtare nga Policia, aksioni u ndërmarr mbrëmë rreth orës 21:40. Të dyshuarit akuzohen për blerje, posedim, shpërndarje dhe shitje të paautorizuar të narkotikëve, si dhe për organizimin e transportimit të tyre drejt tregjeve të huaja. Gjatë këtij intervenimi, autoritetet blu ushtruan kontroll në dy banesa dhe hapësirat e tyre përcjellëse. Sasia e dyshuar e lëndës narkotike u zbulua dhe u sekuestrua brenda bagazhit të njërës prej veturave të kontrolluara. Në cilësinë e provës materiale, përveç 53 kilogramëve të marihuanës, efektivët e policisë konfiskuan edhe dy automjete me targa vendore, si dhe dy aparate telefonike mobile. Në këtë operacion morën pjesë edhe dy skuadra të Njësisë së Reagimit të Shpejtë në Gjilan, ndërsa Njësia e Forenzikës Rajonale u angazhua për dokumentimin fotografik, mbledhjen dhe sigurimin e të gjitha provave në vendin e ngjarjes. Të ndaluarit janë identifikuar si shtetasit kosovarë B.A. (i lindur më 1988) dhe S.H. (i lindur më 1971), të cilët janë marrë në pyetje nga hetuesit në praninë e avokatëve të tyre mbrojtës. Në bazë të vendimit të prokurorit të shtetit, ndaj dy të dyshuarve është caktuar masa e ndalimit prej 48 orësh, ndërkohë që po vijojnë hapat e tjerë proceduralë ligjorë.