Valë shkarkimesh te Arsenali: Arteta mbron largimin e 60 punonjësve si lëvizje drejt suksesit

Drejtuesit e klubit të futbollit Arsenal kanë marrë vendim për të shkurtuar 60 vende pune, një masë kjo që parashikohet t'i kursejë arkave të klubit nga 5 deri në 7 milionë paund në vit. Ky hap financiar koincidon me periudhën kur trajneri Mikel Arteta sapo ka rinovuar kontratën e tij, nga e cila do të përfitojë 20 milionë paund në sezon. Nga ky reformatim do të preken disa sektorë kryesorë, duke përfshirë departamentin komercial, atë të marketingut, si dhe stafin e angazhuar për çështjet e personave me aftësi të kufizuara. Nga ana tjetër, stafi i drejtpërdrejtë i skuadrës mbetet tërësisht i paprekur nga këto masa. I pyetur mbi këtë situatë gjatë një konference për mediat, tekniku spanjoll doli në mbrojtje të klubit londinez, duke e cilësuar këtë proces si pjesë të një zhvillimi të domosdoshëm. "Më është sqaruar me detaje analiza e bërë në nivel drejtues, e cila ka për synim konstant evolucionin dhe përmirësimin e klubit. Është e nevojshme të merren disa vendime për t'u dhënë personave rolet e duhura dhe për të vazhduar investimet me qëllim që të arrijmë objektivat e vendosura dhe suksesin që dëshirojmë," deklaroi Arteta, duke shtuar se megjithatë ai nuk është personi kompetent për t'u përgjigjur mbi çështjet administrative.