Goditje ndaj trafikut të drogës në Kosovë: Sekuestrohen 53 kg marihuanë me vlerë 80 mijë euro, prangosen dy persona

Një operacion i suksesshëm antidrogë i koduar “MALI”, i realizuar mbrëmjen e 16 tetorit, ka çuar në arrestimin e dy personave dhe sekuestrimin e një sasie prej 53 kilogramësh lëndë të dyshuar narkotike të llojit marihuanë. Aksioni u ndërmor rreth orës 21:40 nga hetuesit e Sektorit Qendror në kuadër të Drejtorisë për Hetimin e Trafikimit me Narkotikë. Ky ndërhyrje erdhi si rrjedhojë e një pune hetimore disa-mujore të koordinuar ngushtë me Prokurorinë Themelore në Gjilan. Të arrestuarit dyshohen se ishin pjesë e një rrjeti të angazhuar në blerjen, posedimin dhe shpërndarjen e kundërligjshme të lëndëve narkotike, ndërsa po planifikonin edhe transportimin e kësaj sasie jashtë kufijve të Kosovës. Gjatë kontrolleve të kryera në dy shtëpi banimi dhe objekte përcjellëse, zyrtarët policorë zbuluan lëndën narkotike të fshehur në bagazhin e njërit prej mjeteve motorike. Vlera e drogës së konfiskuar llogaritet të arrijë në rreth 80 mijë euro në tregun vendor. Si prova materiale në këtë rast, përveç 53 kilogramëve të marihuanës, policia sekuestroi gjithashtu dy automjete me targa vendore si dhe dy telefona celularë. Në zbatimin e këtij aksioni dhanë mbështetje dy ekipe të Njësisë së Reagimit të Shpejtë (NJRSH) në Gjilan, si dhe Njësia e Forenzikës Rajonale, e cila realizoi fotografimin, regjistrimin dhe marrjen e provave nga vendi i ngjarjes. Të dyshuarit e identifikuar me inicialet B.A. (i lindur më 1988) dhe S.H. (i lindur më 1971) janë marrë në pyetje në prani të avokatëve të tyre mbrojtës. Me urdhër të prokurorit të shtetit, ndaj tyre është caktuar masa e ndalimit prej 48 orësh.