Tragjedia e mundësit të njohur: Zbardhet shkaku zyrtar i vdekjes në moshën 40-vjeçare

Tre javë pas humbjes tragjike të jetës së mundësit të njohur të AEW-së, Pac, autoritetet kanë bërë publike arsyen e saktë të këtij ngjarjeje të rëndë. Sipas informacioneve të siguruara nga gazetari Edward Lewis i The California Post, i cili i referohet Zyrës së Ekzaminuesit Mjekësor të Qarkut Cook, sportisti u nda nga jeta si pasojë e astmës bronkiale, ndërsa rasti është klasifikuar zyrtarisht si vdekje natyrale. Mundësi, emri i vërtetë i të cilit ishte Benjamin Satterley, ndërroi jetë më 27 shtator, në moshën 40-vjeçare. Ai u gjet pa ndjenja brenda një automjeti me qira, të parkuar jashtë një restoranti në Des Plaines të Illinois, rreth orës 16:00 të asaj të diele, ku autoritetet mbërritën menjëherë për të konfirmuar fatkeqësinë. Që në fillim, autoritetet policore bënë të ditur se nuk kishte dyshime për ndonjë ndërhyrje të mundshme kriminale apo rrethana të tjera të dyshimta në këtë ngjarje. Gjatë kontrollit në vendngjarje, oficerët vunë re se telefoni i Satterley-t po binte vazhdimisht. Pasi një efektiv iu përgjigj thirrjes, një grua në linjë u identitet si njohëse e mundësit, duke treguar se kishte folur pak çaste më parë me të dhe se ai po drejtohej për të ngrënë drekë në restorantin CAVA. Në raportet e policisë u përmend gjithashtu prania e mbetjeve të substancës së njohur si salvia në këmishën e sportistit, si dhe e një ilaçi të paidentifikuar në automjet, emri i të cilit u hoq më vonë nga dokumentacioni zyrtar i ngjarjes. Satterley e pati nisur rrugëtimin e tij në ring si profesionist në vitin 2004. Ndërmjet viteve 2012 dhe 2018, ai u bë mjaft i famshëm në WWE, ku u aktivizua edhe me emrin Adrian Neville brenda divizionit NXT. Më pas, në vitin 2019, ai u bë pjesë e All Elite Wrestling (AEW). Gjatë dy dekadave të karrierës, Pac fitoj zemrat e publikut dhe u shndërrua në një nga figurat më të dashura të këtij sporti, duke fituar titullin e parë AEW International Championship në vitin 2022, krahas tre trofeve të tjerë gjatë angazhimit të tij në këtë kompani. Vlen të theksohet se vetëm pak orë para se të ndërronte jetë, më pak se 24 orë, Satterley kishte zhvilluar një përballje të fortë kundër Andrade El Idolo për AEW National Championship, në kuadër të eventit AEW All Out të mbajtur në Çikago.