Kosova synon blindimin e hapësirës ajrore: Adresohet kërkesa në SHBA për helikopterë dhe sisteme mbrojtëse për FSK-në

Forca e Sigurisë së Kosovës (FSK) ka nisur zyrtarisht hapat për pajisjen me fluturake ushtarake, duke i dërguar kërkesë Uashingtonit zyrtar për blerjen e helikopterëve. Ministri i Mbrojtjes, Ejup Maqedonci, ka bërë me dije se prioritet kyç në vazhdimësi mbetet ndërtimi i kapaciteteve të mbrojtjes ajrore, teksa ka nënvizuar edhe sfidat e sigurisë dhe rreziqet që vijnë nga Serbia për stabilitetin e vendit dhe të gjithë rajonit. Sipas ministrit Maqedonci, iniciativa për prokurimin e helikopterëve rrjedh nga komandanti i FSK-së dhe do të realizohet përmes programit amerikan për Shitje Ushtarake Jashtë Vendit (FMS). Ky proces zhvillohet drejtpërdrejt me Departamentin Amerikan të Mbrojtjes, i cili menaxhon të gjitha fazat e negociatave, prokurimit dhe procedurave të blerjes. Eksponenti i kabinetit qeveritar vuri në dukje se, përkundër faktit që ushtria e Kosovës tashmë ka në dispozicion tri lloje të ndryshme të fluturakeve pa pilot (dronë), vëmendja kryesore në fazën vijuese do të përqendrohet te mbrojtja e hapësirës ajrore nga goditjet e mundshme rivale. Ai sqaroi se për këtë objektiv po punohet ngushtë me partnerët strategjikë amerikanë, si për mbrojtjen kundërajrore, ashtu edhe për mbështetjen ajrore përmes helikopterëve. Sa i përket investimeve të kryera përgjatë tri deri katër viteve të fundit, kreu i dikasterit të Mbrojtjes deklaroi se FSK-ja ka pasuruar ndjeshëm arsenalin e saj ushtarak. Ndër pajisjet e siguruara përfshihen katër tipe të sistemeve antitank, modele të ndryshme mortajash për qitje në distanca të shumëllojshme, automjete të specializuara ushtarake, si dhe sisteme të artilerisë lëvizëse. Përveç furnizimit me armatim, ushtria ka përshtatur strukturën e saj me nevojat reale të kohës. Janë krijuar dhe bërë plotësisht operacionale dy njësi të reja strategjike: ajo për operacione speciale dhe njësia e mjeteve ajrore pa pilot. Këto struktura nuk ishin të parashikuara në planin fillestar të tranzicionit, i cili bazohej në vlerësimin e rreziqeve të vitit 2014, por u jetësuan pas analizimit të situatës aktuale të sigurisë. Në përmbyllje, Maqedonci nënvizoi se plotësimi i FSK-së me kuadro njerëzore po ecën dy vjet përpara afateve të parapara, ndërsa po punohet intensivisht edhe për rekrutimin e përbërjes aktive të rezervistëve. Ai shtoi se falë përkrahjes së vazhdueshme financiare dhe politike nga ekzekutivi dhe kryeministri, ushtria ka arritur të shumëfishojë llojllojshmërinë e sistemeve mbrojtëse në shërbim të sovranitetit të Kosovës.