Panik dhe kaos momental në Japoni: Alarmi i rremë për lëkundje shkatërruese prej 9.9 ballësh detyron autoritetet të kërkojnë ndjesë

Miliona qytetarë në Japoni janë përfshirë nga frika dhe ankthi, pasi Agjencia Meteorologjike e vendit ka lshuar gabimisht një sinjal alarmi për një tërmet apokaliptik me magnitudë 9.9. Ky njoftim emergjent ka aktivizuar menjëherë telefonat celularë të banorëve, ndërkohë që autoritetet kanë ndërhyrë pak minuta më vonë për të korrigjuar gabimin teknik. Ngjarja është shënuar të premten, më 16 tetor. Fillimisht, Agjencia Meteorologjike e Japonisë (JMA) raportoi se një lëkundje e fuqishme prej 9.9 ballësh ishte zbuluar pranë Ishujve Kurile, të njohura ndryshe në vend si Ishujt Chishima. Megjithatë, pas një analize të hollësishme të të dhënave, institucioni ka korrigjuar shifrat, duke bërë të ditur se magnituda reale ishte 6.9 dhe se epiqendra ndodhej pranë Gadishullit Kamchatka në Rusi, menjëherë pas mesditës. Sipas matjeve zyrtare, tërmeti kishte një thellësi prej afërsisht 160 kilometrash. Sipas shpjegimeve të dhëna nga Agjencia Meteorologjike e Japonisë, defekti erdhi si pasojë e një llogaritjeje të gabuar të vendndodhjes së epiqendrës. Sistemi automatik e kishte llogaritur atë rreth 680 kilometra më larg territorit japonez nga sa ishte në realitet, gjë që solli një vlerësim krejtësisht të pasaktë të forcës së tërmetit. Kjo bëri që sistemi të transmetonte alarmin për 9.9 ballë, i cili u anulua brenda pak minutash sapo u vunë re pasaktësitë. Ky alarm i menjëhershëm shkaktoi bllokime dhe ndërprerje afatshkurtra në rrjetin e transportit publik, ndërsa fatmirësisht nuk u raportuan skena paniku masiv në popullatë. Përballë kësaj situate, krerët e Agjencisë Meteorologjike të Japonisë dolën në një prononcim zyrtar për të pranuar lëshimin dhe për t'i kërkuar falje qytetarëve. “Ne kërkojmë ndjesë sinqerisht për shqetësimin e konsiderueshëm të shkaktuar ndaj publikut”, theksoi gjatë konferencës për shtyp zyrtari i agjencisë, Shinya Tsukada. Ky incident ka rikthyer në qendër të vëmendjes domosdoshmërinë e saktësisë maksimale në mekanizmat e paralajmërimit të hershëm, të cilat përbëjnë një mekanizëm jetik për sigurinë kombëtare dhe mbrojtjen e jetëve në Japoni.