Urdhri i Uashingtonit: Trump ngrin disa nga sanksionet kundër Moskës, hyn në fuqi legjislacioni i ri

Kreu i Shtëpisë së Bardhë, Donald Trump, ka ndërmarrë hapa për të pezulluar disa prej masave ndëshkimore ndaj Rusisë të votuara nga Kongresi amerikan, pavarësisht se ky legjislacion i ri ka për qëllim forcimin e trysnisë ekonomike kundër Kremlinit për shkak të agresionit ushtarak në Ukrainë. Nëpërmjet një urdhri ekzekutiv të lëshuar të premten në mbrëmje, kreu i shtetit arsyetoi se ngrirja e përkohshme e disa prej këtyre dispozitave shërben për “interesin kombëtar” të Shteteve të Bashkuara. Ky ligj ishte dekretuar nga presidenti gjatë muajit shtator, ndërsa data e nisjes së zbatimit të tij ishte caktuar për 18 tetor. Lëvizja e fundit pason deklaratat e bujshme të Trumpit se Uashingtoni do të blejë naftë nga Rusia, me synimin për të frenuar kostot e energjisë në prag të zgjedhjeve të mesit të mandatit në nëntor. Ky qëndrim ka prodhuar kritika të ashpra nga ana e ligjvënësve amerikanë të të dy krahëve politikë. Legjislacioni në fjalë, i njohur si ligji Graham, përfshin sanksione të rënda ekonomike ndaj Moskës dhe i jep autoritet kreut të ekzekutivit të vendosë tarifa deri në 100 për qind për pesë importuesit kryesorë të hidrokarbruve ruse, ku përfshihen shtete si Kina dhe India. Po ashtu, paketa parashikon masa të forta ndaj vetë presidentit rus Vladimir Putin, zyrtarëve kryesorë të administratës së tij, sektorit bankar dhe financiar, si dhe flotës së anijeve çisternë që shfrytëzohen nga Rusia për t'i shpëtuar kufizimeve ekzistuese. Vetëm një ditë më parë, një bllok prej 20 ligjvënësish nga radhët e demokratëve dhe republikanëve i patën drejtuar një thirrje publike Trumpit që t'i përmbahet zbatimit të plotë të ligjit të ri. Në dokumentin e tyre dërguar ekzekutivit, ata nënvizuan se aplikimi i plotë i sanksioneve është i domosdoshëm për të gjunjëzuar ekonomikisht Putinin dhe për ta detyruar atë të angazhohet me seriozitet në tryezën e bisedimeve për paqe.