Nga privilegjet në qeli te përleshja fizike: Sean “Diddy” Combs transferohet urgjentisht në një tjetër burg

Muzikanti dhe producenti i njohur amerikan, Sean Combs, i njohur gjerësisht me emrat skenikë “Diddy” dhe “Puff Daddy”, është zhvendosur në një institucion të ri penitenciar në shtetin e Pensilvanisë. Ky vendim i autoriteteve erdhi pas raportimeve se ai po shijonte kushte luksoze brenda burgut në Nju Xhirsi, si dhe pas një incidenti dhune ku mbeti i lënduar. Sipas të dhënave zyrtare, Combs u transferua nga objekti ku po qëndronte në Nju Xhirsi drejt burgut të ri në Pensilvani. Zëdhënësja e tij, Juda Engelmayer, deklaroi lidhur me këtë zhvillim: “Sean është i përqendruar në vazhdimin e jetës së tij. Shpresojmë që procesi në objektin e tij të rij të jetë efikas dhe pa ndërprerje të panevojshme.” Megjithëse autoritetet konfirmuan lëvizjen e të dënuarit, ato refuzuan të jepnin detaje të mëtejshme rreth ngjarjes. Lëvizja e reperit erdhi pas pretendimeve të bëra publike në shtator, sipas të cilave ai bënte një jetë të privilegjuar prapa hekurave. Raportohej se të burgosurit e tjerë gatuanin për të, i pastronin dhomën, i rregullonin shtratin, i bënin masazhe dhe se ai përdorte një telefon celular të ndaluar për të pasur qasje në rrjetet sociale. Po ashtu, më 14 tetor u bë e ditur se Combs u përfshi në një përleshje me një të burgosur tjetër, nga ku mori lëndime që kërkuan dërgimin e tij jashtë ambienteve të burgut për trajtim mjekësor. Sean Combs u arrestua më 16 shtator 2024, nën akuza të rënda që përfshijnë trafikimin seksual, punën e detyruar, rrëmbimin, heqjen e paligjshme të lirisë, zjarrvënien, posedimin e lëndëve narkotike, ryshfetin dhe pengimin e drejtësisë. Sipas aktakuzës së bërë publike nga gjykata, Combs organizonte festa të quajtura “Freak Offs”, të cilat zhvilloheshin në shtëpitë e tij, zgjatnin me ditë të tëra dhe shpesh filmoheshin. Në këto ngjarje, pjesëmarrësit detyroheshin të kryenin marrëdhënie seksuale. Hetuesit specifikuan se ai përdorte ndikimin e tij, dhunën ekonomike, psikologjike, verbale dhe fizike për të kontrolluar viktimat, ndërsa gjatë bastisjeve në pronat e tij u sekuestruan lëndë narkotike. Gjithashtu, ai akuzohet se u ofroi ryshfet dëshmitarëve dhe viktimave për të heshtur ose për të dhënë dëshmi të rreme. Në vendimin e saj të datës 3 tetor 2025, gjykata e dënoi Combs me 4 vjet e 2 muaj burgim për veprën penale të transportimit të grave nëpër shtete të ndryshme me qëllim trafikimin seksual, si dhe e ngarkoi me detyrimin për të paguar 500,000 dollarë dëmshpërblim. Ky dënim mbështetet në “Aktin Mann” të vitit 1910, një ligj federal në SHBA që penalizon transportin e grave ose vajzave ndërmjet shteteve për qëllime prostitucioni, shthurjeje apo veprimesh të tjera imorale.