Formë e shkëlqyer e durrsakëve, Teuta shkëputet në krye të klasifikimit

Teuta vijon marshimin e sigurt në kampionat, duke konfirmuar formën e lartë dhe duke krijuar një distancë të sigurt nga ndjekësit më të afërt në renditje. Ndeshja mes Dinamos dhe Teutës, e cila u luajt në stadiumin “Elbasan Arena”, shërbeu si hapje e javës së shtatë të Kategorisë Superiore. Falë fitores së pastër 0-2 në transfertë kundër dinamovitëve, ekipi i drejtuar de Edlir Tetovës ka konsoliduar vendin e parë me 19 pikë të grumbulluara nga 7 takime. Ky rezultat e çon në 4 pikë epërsinë ndaj Egnatias e cila luan më vonë, ndërsa diferenca me Dinamon e Ilir Dajës, që pozicionohet e treta, është thelluar në plot 7 pikë. Sa i përket zhvillimit të kësaj jave, kalendari parashikon që nesër të luhen dy sfidat e radhës mes Tiranës dhe Laçit, si dhe Skënderbeut me Elbasanin. Ndërkaq, java e shtatë do të mbyllet zyrtarisht të dielën me dy përballjet e tjera interesante, Vora-Partizani dhe Egnatia-Vllaznia.