Nga Superiorja te goli në Poloni, ish-sulmuesi i Elbasanit shkëlqen dhe feston me shqiponjë

Futbollisti Amarildo Gjoni ka lënë menjëherë gjurmë në aventurën e tij të re në futbollin polak, duke gjetur rrjetën dhe duke festuar në mënyrë kuqezi me simbolin e shqiponjës. Në takimin e zhvilluar kundër Pogon Siedlce, 27-vjeçari ka deponuar topin në rrjetë në minutën e 48-të, duke zhbllokuar shifrat e sfidës dhe duke i dhënë epërsinë skuadrës së tij, Puszcza. Momenti i golit erdhi pas një harkimi nga goditja e këndit, ku sulmuesi provoi fatin me kokë. Edhe pse tentativa e parë u neutralizua nga portieri kundërshtar, lojtari shqiptar tregoi nuhatje prej goleadori duke ndjekur aksionin dhe, me një tjetër goditje të saktë me kokë, mposhti përfundimisht mbrojtjen dhe portierin rival. Ky realizim përfaqëson golin e parë sezonal për Gjonin në "Betclic 1. Liga", e cila përbën kategorinë e dytë të futbollit në Poloni. Kujtojmë se sulmuesi qendror iu bashkua kësaj skuadre pasi më parë, gjatë sezonit 2024-2025, ka qenë pjesë e rëndësishme e Elbasanit në Kategorinë Superiore.