Gjenerali i lartë i NATO-s: Potenciali ynë ushtarak lë pas atë të Moskës

Komandanti Suprem i Forcave Aleate të NATO-s në Evropë, gjenerali amerikan Alexus Grynkewich, ka theksuar se kapacitetet mbrojtëse të Aleancës Euroatlantike mbeten shumë herë më të larta se ato të Federatës Ruse. Gjatë një interviste për revistën e njohur gjermane “Der Spiegel”, e cila u bë publike të premten, Grynkewich bëri të ditur se në rast të një ballafaqimi të gjerë, NATO posedon mundësi për të angazhuar trupa dhe mjete dukshëm më superiore krahasuar me Moskën. Sipas vlerësimeve të tij, kreu i Kremlin, Vladimir Putin, vështirë se do të ndërmarrë një agresion ushtarak konvencional në shkallë të gjerë kundër shteteve evropiane. Në vend të kësaj, ai po mbështetet tek taktika hibride, si sabotimet, për të ikur nga një konfrontim ballor me fuqitë e NATO-s. Grynkewich vuri në dukje domosdoshmërinë që Aleanca të ruajë epërsinë e saj në terren përmes investimeve për modernizimin e armatimit, zhvillimit të manovrave ushtarake në shkallë të gjerë dhe shfaqjes së vazhdueshme të gatishmërisë operative. Në fund, ai bëri me dije se strategjia e Putinit synon zbehjen e solidaritetit qytetar me Ukrainën, duke përhapur panik se ndihmat për Kievin rrezikojnë të nxisin një konflikt të hapur me rusët, ndonëse deri më tani ky plan nuk ka prodhuar rezultatet e dëshiruara.