Nga gëzimi i pushimeve te makthi: Babai gjobitet pas rënies fatale të djalit 2-vjeçar nga dritarja në Qipro

Një pushim familjar që premtonte momente gëzimi është shndërruar në një dramë të papërshkruar për një shtetas britanik, pasi një gjykatë në Qipro ka vendosur një gjobë prej 3 mijë eurosh ndaj 37-vjeçarit nga Essex-i, djali i vogël të cilit humbi jetën tragjikisht. Ngjarja tronditëse u regjistrua më 12 korrik, në ditën e parë të akomodimit të familjes në kompleksin hotelier “King Evelthon Beach Hotel and Resort”, të vendosur në zonën e Chlorakas. Sipas dosjes hetimore, Joshua Foster po lëvizte drejt zonës së ashensorit në shoqërinë e vjehrrit dhe djalit të tij 2-vjeçar. Kur i mituri vuri re një park ujor jashtë ndërtesës, babai e ngriti atë dhe e mbështeti te parvazi i dritares për t'i treguar pamjen, nën besimin e gabuar se xhami ishte i mbyllur. Në atë fraksion sekonde, vogëlushi u rrëzua nga lartësia prej rreth 12 metrash. Menjëherë pas aksidentit, fëmija u transportua me urgjencë në Spitalin e Përgjithshëm të Pafosit, ku mjekët konstatuan zyrtarisht ndarjen e tij nga jeta. Gjatë seancës gjyqësore, Foster u deklarua fajtor për akuzën e shkaktimit të vdekjes përmes sjelljes së pakujdesshme dhe të rrezikshme. Megjithatë, gjyqtarja Froso Christodoulidou theksoi se nuk ekzistonin prova që tregonin se i ati e kishte vënë qëllimisht fëmijën në rrezik, duke e cilësuar ngjarjen si një gabim njerëzor të çastit që prodhoi pasoja fatale. Pas shpalljes së vendimit të gjykatës, familjarët shprehën një ndjenjë lehtësimi që ky kalvar ligjor mori fund, duke shtuar megjithatë se plagët dhe dhimbja për humbjen e djalit do të mbeten të pashlyeshme përgjithmonë. Në prononcimin e tij, mbrojtësi ligjor i 37-vjeçarit, avokati Alexandros Alexandrou, kritikoi ndjekjen penale të kësaj ngjarjeje, duke vlerësuar se ajo nuk duhej të kishte shkuar kurrë në dyert e drejtësisë. Ai kujtoi se klienti i tij vuajti tetë ditë paraburgim pas tragjedisë, kohë gjatë së cilës iu mohua e drejta elementare për të vajtuar fëmijën e tij.