Dyshime për marrëveshjen e gazit, Këlliçi kërkon ndërhyrjen e SPAK: Qeveria po anashkalon SHBA-në

Deputeti i Partisë Demokratike, Belind Këlliçi, ka hedhur akuza të forta në drejtim të qeverisë shqiptare në lidhje me marrëveshjen për furnizimin me gaz të lëngshëm. Përmes një reagimi publik, ai ka kërkuar një hetim të thelluar nga Prokuroria e Posaçme (SPAK) për kontratën e lidhur mes ekzekutivit, kompanisë greke “Aktor” dhe operatorit “Albgaz”, duke vënë në pikëpyetje transparencën e procesit. Sipas Këlliçit, është shqetësuese se si qeveria ka zgjedhur të ndërhyjë përmes një kompanie greke në rolin e ndërmjetësit, ndërkohë që në vitin 2020 Shqipëria kishte nënshkruar një Memorandum Mirëkuptimi me gjigantin amerikan “ExxonMobil”. Deputeti demokrat thekson se grupi “Aktor” nuk ka ofruar asnjë garanci konkrete se si do të realizohet furnizimi fizik i vendit me gaz brenda vitit 2030. Një tjetër pikë e nxehtë e denoncuar nga Këlliçi është karakteri detyrues (“binding”) i kontratës së nënshkruar nga pala shqiptare. Duke iu referuar raportimeve të “Wall Street Journal”, ai ka ngritur pyetje mbi arsyet pse Shqipëria është i vetmi shtet që ka pranuar një kusht të tillë të disfavorshëm, duke kërkuar shpjegime urgjente nga autoritetet. Partia Demokratike e konsideron këtë marrëveshje si një kërcënim për bashkëpunimin strategjik me Shtetet e Bashkuara të Amerikës. Sipas tyre, ky proces rrezikon të shndërrohet në një mjet për interesat lokale dhe rajonale, duke dëmtuar integritetin e Koridorit Vertikal të Gazit. Këlliçi ka mbyllur reagimin e tij me akuza të rënda ndaj Kryeministrit Edi Rama, duke e cilësuar atë si një partner që po minon interesat strategjike të aleatëve perëndimorë.