Armir Grima merr drejtimin e Shoqatës Rajonale të Futbollit Shkodër

Komuniteti i futbollit në qytetin verior ka një drejtues të ri. Armir Grima është zgjedhur zyrtarisht në krye të Shoqatës Rajonale të Futbollit Shkodër, duke marrë kështu frerët e këtij institucioni sportiv. Në kuadër të Asamblesë së Përgjithshme të Jashtëzakonshme të kësaj shoqate, Grima ka marrë mbështetjen e plotë të 20 anëtarëve me të drejtë vote, çka shënon një hap të rëndësishëm përpara drejt vazhdimësisë së projekteve për zhvillimin e lojës së dashur në këtë rajon. Mbledhja e jashtëzakonshme u thirr nga drejtuesit e Shoqatës pasi ky post mbeti i lirë pas dorëheqjes së Lazer Matijas, me qëllim garantimin e mbarëvajtjes dhe funksionimit normal të institucionit. Sipas Komisionit të Verifikimit, institucioni përgjegjës për mbarëvajtjen e zgjedhjeve, në garë ishte paraqitur vetëm një kandidaturë, ajo e Armir Grimës, e cila mbështetej nga 20 prej 21 anëtarëve zyrtarë të SHRF Shkodër. Në këtë ngjarje të rëndësishme institucionale morën pjesë gjithsej 30 delegatë. Menjëherë pas kurorëzimit në detyrë, kreu i ri i Shoqatës Rajonale të Futbollit Shkodër, Armir Grima, shprehu mirënjohjen e tij për mbështetjen e treguar, duke vënë theksin te puna në grup dhe bashkimi i forcave për të çuar përpara futbollin shkodran. “Të nderuar anëtarë të Shoqatës Rajonale të Futbollit Shkodër, Ju falënderoj sinqerisht për besimin që më dhatë sot dhe për mbështetjen tuaj. E vlerësoj këtë përgjegjësi dhe e marr me respektin e duhur ndaj Shoqatës, anëtarëve të saj dhe traditës së futbollit në Shkodër. Besoj se puna jonë në vijim duhet të mbështetet mbi bashkëpunimin, komunikimin dhe angazhimin e përbashkët të të gjithë anëtarëve. Ka shumë për të bërë dhe synimi im është që, së bashku, të vijojmë të forcojmë aktivitetin e Shoqatës dhe të krijojmë sa më shumë mundësi për zhvillimin e futbollit në të gjithë rajonin. Dua të falënderoj Komisionin e Verifikimit për punën dhe profesionalizmin e treguar gjatë procesit zgjedhor, si dhe të gjithë ju për besimin e dhënë. Ju siguroj se do të jem i angazhuar për të përfaqësuar interesat e Shoqatës dhe për të punuar në bashkëpunim me të gjithë anëtarët e saj. Faleminderit edhe një herë për besimin. Ju uroj punë të mbarë dhe suksese për Shoqatën Rajonale të Futbollit Shkodër”,– u shpreh Armir Grima.