Krizë në shtëpinë e futbollit botëror: Gianni Infantino ballafaqohet me kritika të ashpra nga evropianët

Kreu i shtëpisë më të madhe të futbollit botëror, Gianni Infantino, ka ndërmarrë një hap prapa duke i kërkuar falje zyrtarëve të Këshillit të FIFA-s lidhur me mënyrën se si është menaxhuar një nismë për investime komerciale. Megjithatë, ndjesa e kreut të organizatës nuk ka arritur të qetësojë pakënaqësitë e shprehura nga krerët e futbollit në Gjermani dhe Angli. Gjatë mbledhjes së Këshillit të FIFA-s, Infantino pranoi se kishte lëshuar pe në aspektin e komunikimit dhe të konsultimeve lidhur me projektin e njohur si “FIFA Forward Enterprise” (FFE). Ky projekt synonte t'u shiste investitorëve privatë një pjesë të vogël të të drejtave komerciale për garat e organizuara nga FIFA, ku përfshihet edhe Kupa e Botës. Sipas numrit një të futbollit global, ky dokument nuk ka qenë kurrë në fazën e finalizimit, por drejtuesit e federatave gjermane dhe angleze e kanë konsideruar të pamjaftueshëm reflektimin e tij, duke kërkuar llogaridhënie më të gjerë për proceset vendimmarrëse. Presidenti i Federatës Gjermane të Futbollit, Bernd Neuendorf, ka bërë thirrje për një nisje nga e para të gjithë strukturës së FIFA-s, duke vënë në dyshim serioz suksesin e reformave nën drejtimin e deritanishëm të Infantinos. Neuendorf ka shprehur indinjatën e tij se anëtarët e këshillit e kuptuan për ekzistencën e projektit FFE përmes mediave, në vend që të njoftoheshin zyrtarisht nga administrata. Ndërkohë, kryetarja e Shoqatës Angleze të Futbollit, Debbie Hewitt, ka kërkuar qartësi për shqetësimet e ngritura dhe ka kërkuar që anëtarëve t'u vihen në dispozicion dokumentet përkatëse të këtij investimi. Sipas saj, mungesa e hapjes ndaj informimit mund të dëmtojë edhe më shumë autoritetin dhe integritetin e Infantinos në krye të institucionit. Hewitt ka kërkuar transparencë shtesë edhe për çështje të tjera të ndjeshme, përfshirë trajtimin e një rasti disiplinor që lidhet me sulmuesin amerikan Folarin Balogun, si dhe vendimin kontrovers për t'i ndarë Presidentit të Shteteve të Bashkuara, Donald Trump, Çmimin e Paqes nga FIFA. Megjithatë, jo të gjithë anëtarët e këshillit janë rreshtuar krah kritikëve evropianë. Presidenti i Federatës së Futbollit të Mauritanisë, Ahmed Yahya, ka dalë në mbrojtje të hapur të Infantinos, duke përmendur si sukses rritjen e buxheteve për federatat kombëtare dhe formatin e ri të Kupës së Botës me 48 ekipe. Yahya theksoi se shumica e shteteve afrikane qëndrojnë pas vazhdimësisë së tij në krye të organizatës. Këto tensione të brendshme vijnë në një periudhë tejet vendimtare për FIFA-n, ndërkohë që Infantino synon një mandat tjetër në krye të presidencës gjatë zgjedhjeve të planifikuara për në muajin mars të vitit 2027.