Pas gati tre dekadash pritjeje, identifikohen eshtrat e Idriz Rrecajt: Babai im po kthehet në Kosovën e lirë

Emocione të papërshkrueshime dhe dhimbje e shuar pas një lufte të gjatë me pasigurinë. Shpëtim Rrecaj, i biri i Idriz Rrecajt, ka ndarë ndjenjat e tij më të thella pas konfirmimit zyrtar të identitetit të babait të tij, fati i të cilit ka qenë i panjohur për plot 27 vjet. Pas një kalvari të gjatë pritjeje, familja ka arritur të gjejë më në fund qetësinë, duke marrë përgjigjen e shumëpritur për fatin e dashurit të tyre që u zhduk pa gjurmë në muajin prill të vitit 1999. “Për 27 vjet familjen tonë e ka përcjellë pyetja ‘ku është babai juaj Idriz Rrecaj?’ Sot më në fund e kemi një përgjigje, babai im po kthehet në tokën e Kosovës së lirë për të cilën jetoi dhe sakrifikoi”, është shprehur Shpëtim Rrecaj. Duke sjellë ndërmend ato momente të rënda, ai ka treguar se ishte vetëm fëmijë, gjashtë vjeç, kur humbi kontaktet me të atin, duke u rritur përgjatë gjithë këtyre viteve me një mall të papashkruar dhe me shpresën e palëkundur për të zbardhur të vërtetën. “Gjetja e eshtrave të tyre është dëshmi se e vërteta mund të vonojë por nuk mund të zhduket. Gjaku nuk humb dhe sakrifica për liri nuk harrohet”, ka theksuar ai në rrëfimin e tij prekës. Me gjetjen e eshtrave, të cilat u identifikuan përmes procedurave shkencore të ADN-së, familja Rrecaj tashmë ka një adresë të shenjtë ku do të mund të vendosë lule dhe të nderojë kujtimin e tij pas kaq shumë kohësh. Ceremonia e rivarrimit të Idriz Rrecajt do të organizohet këtë të premte në qytetin e Skenderajt, ku do t'i jepet edhe lamtumira e fundit.