Zbulim i hershëm në rritje: Mbi 53% e rasteve të kancerit të gjirit në Kosovë u kapën në fazat fillestare gjatë 2025

Ministri i Shëndetësisë, Arben Vitia, bëri të ditur se gjatë vitit 2025, 53.4% e rasteve të kancerit të gjirit në vend janë diagnostikuar në fazën e parë dhe të dytë. Sipas tij, këto shifra përbëjnë një tregues inkurajues dhe janë çelësi për suksesin e trajtimit në kohë të kësaj sëmundjeje. Këto deklarata u bënë gjatë fjalës së tij në konferencën ndërkombëtare me titull “Karcinoma e Gjirit dhe Sfidat e Saj”, e cila po zhvillohet në kuadër të muajit dedikuar ndërgjegjësimit për këtë sëmundje, ku u vu theksi te domosdoshmëria e kontrolleve periodike dhe lehtësimit të qasjes në kujdesin shëndetësor. “Përmes këtij plani synojmë organizim më të mirë të kontrolleve dhe zgjerim të mundësive për zbulim të hershëm. Mamografia në institucionet tona publike është falas gjatë gjithë vitit”, u shpreh ministri Vitia gjatë fjalimit të tij. Ai gjithashtu njoftoi se, për herë të parë, Kosova ka në fuqi Planin e Veprimit për Skriningun e Kancerit të Gjirit 2026–2028. Krahas mamografit ekzistues në Fushë Kosovë, ai paralajmëroi vendosjen e tetë mamografëve të rinj digjitalë në komunat që ende nuk i kanë këto pajisje, ndërsa shtoi se mamografi mobil vazhdon të ndihmojë në shtrirjen e kontrolleve anembanë vendit. Duke folur për kapacitetet spitalore, Vitia përmendi modernizimin e shërbimeve të radioterapisë në Klinikën e Onkologjisë përmes dy akseleratorëve të rinj, ku njëri prej tyre shfrytëzon teknologjinë e avancuar SBRT. Ministri vuri anë tjetër theksin te rëndësia e përkrahjes psikologjike për gratë e prekur nga kanceri i gjirit, duke nënvizuar se ato meritojnë informim të plotë dhe mbështetje emocionale gjatë gjithë rrugtimit të shërimit. “Detyra jonë është që këtyre pyetjeve t’u përgjigjemi me shpresë, me zgjidhje dhe me kujdes në kohë”, u shpreh ndër të tjera Vitia, duke shprehur mirënjohje për punonjësit shëndetësorë dhe gratë që ndajnë rrëfimet e tyre personale për të ndërgjegjësuar të tjerët. Nga ana e tij, drejtori i Klinikës së Onkologjisë, Ilir Kurtishi, theksoi se investimet e deritanishme në pajisje të teknologjisë së fundit dhe trajtimet bashkëkohore kanë ngritur ndjeshëm cilësinë e shërbimeve mjekësore për pacientët me sëmundje malinje në Kosovë. Në fjalën e mbajtur në të njëjtën konferencë ndërkombëtare, Kurtishi vlerësoi përmirësimet në fushën e radioterapisë, qasjen në barna inovative dhe optimizimin e proceseve të përgatitjes së terapisë mjekësore. “Duke zbatuar këto metoda bashkëkohore të rrezatimit, mundësojmë një trajtim më të saktë, më të përshtatshëm për nevojat individuale të pacientëve”, deklaroi drejtori i Onkologjisë. Ai bëri të ditur se klinika që drejton posedon tri aparatura për radioterapi, përmes të cilave zbatohen teknika të sofistikuara si radioterapia me intensitet të moduluar (IMRT) dhe stereotaksia. Kurtishi gjithashtu veçoi rëndësinë e sigurimit të barnave të reja kundër kancerit të gjirit, të cilat mundësojnë një qasje të personalizuar bazuar në profilin klinik të çdo pacienti. Sa i takon infrastrukturës, ai njoftoi se janë duke u zhvilluar procedurat për instalimin e sistemeve automatike për përgatitjen e barnave citostatike. “Këto investime dhe ndryshime organizative synojnë të rrisin sigurinë, saktësinë dhe efikasitetin në përgatitjen dhe administrimin e terapive, duke vendosur sigurinë e pacientëve në qendër të çdo procesi”, përfundoi Kurtishi, duke shtuar se përparimi i mëtutjeshëm kërkon investime të vazhdueshme, trajnim profesional dhe bashkëpunim ndërkombëtar.