Thirrje nga zemra për studentët: Këngëtarja e njohur i shkruan letër publike Edi Ramës

Këngëtarja e mirënjohur shqiptare, Shkurte Fejza, i ka drejtuar një letër të hapur kreut të Qeverisë së Shqipërisë, Edi Rama, duke i kërkuar angazhim dhe vëmendje ndaj kërkesave të studentëve, me qëllim arritjen e një zgjidhjeje përmes dialogut dhe mirëkuptimit reciprok. Përmes një postimi në rrjetet sociale, artistja ka nënvizuar se rinia universitare nuk duhet të trajtohet si palë kundërshtare, por përkundrazi, si shtylla kurrizore dhe e ardhmja e sigurt e shoqërisë sonë. Ajo i ka bërë apel kryeministrit Rama që të hapë rrugën e pajtimit dhe të vendimmarrjes së drejtë, e cila do të kthente shpresën te të rinjtë dhe do të sillte qetësi të merituar në familjet e tyre. “Kur studentët ngrenë zërin për shqetësimet e tyre, le t’i dëgjojmë me vëmendje, pa paragjykime dhe pa i parë si kundërshtarë. Ata janë bijtë dhe bijat e Shqipërisë, janë rinia ku mbështetet e ardhmja e këtij vendi”, ka shprehur ndër të tjera ajo. Fejza ka shtuar se lidershipi i vërtetë nuk dëshmohet vetëm përmes vendimeve zyrtare, por po aq rëndësi ka edhe aftësia dhe gatishmëria për të dëgjuar hallet e qytetarëve. Gjithashtu, ajo ka kërkuar që të parandalohet çdo lloj përçarjeje, duke theksuar nevojën për të ngritur ura të forta besimi mes strukturave shtetërore dhe popullit. “Shqipëria është më e madhe se secili prej nesh. Ajo është shtëpia jonë e përbashkët, është amaneti i të parëve dhe ëndrra e fëmijëve tanë”, ka shtuar ajo në mesazhin e saj. Në mbyllje të kësaj letre, artistja ka uruar që dialogu të shërbejë si mjet bashkimi, duke dëshiruar që vendi të ketë më shumë paqe sociale, drejtësi dhe harmoni për të gjithë qytetarët.