Protestat dhe tensionet, Këshilli Ndërfetar: Institucionet të reagojnë, zëri i rinisë të dëgjohet përmes dialogut

Këshilli Ndërfetar i Shqipërisë ka dalë me një thirrje publike për qetësi, llogaridhënie dhe hapjen e kanaleve të dialogut kombëtar, pas zhvillimeve të fundit në vend të shënuara nga protestat e të rinjve dhe përplasjet me forcat e rendit. Udhëheqësit e bashkësive fetare vlerësojnë se ankesat e qytetarëve dhe studentëve kërkojnë vëmendje maksimale, ndërsa shteti duhet të ofrojë zgjidhje të qarta, transparente dhe të bazuara rreptësisht në ligj. Në mesazhin e tyre, krerët fetarë theksojnë se paqja mbetet një mision i përbashkët dhe drejtësia një detyrim ligjor e moral. Sipas tyre, e ardhmja e vendit varet nga brezat e rinj, të cilëve duhet t'u trashëgohet një shoqëri ku drejtësia ngjall shpresë dhe bashkëjetesa është vlerë e pacenueshme. Ata theksojnë se paqja nuk nënkupton heshtje ndaj padrejtësive, por as dhuna nuk mund të jetë mjet për të kërkuar të drejtën. Këshilli rikujton se e drejta për të protestuar në mënyrë paqësore përbën një gur themelor të demokracisë. Megjithatë, aktet e dhunës, dëmtimi i pronës publike dhe private, apo cenimi i lirive të të tjerëve mbeten të pafalshme dhe nuk mund të arsyetohen nga asnjë lloj pakënaqësie. Në këtë linjë, institucioni vë në dukje se goditja e një biznesi familjar rrezikon drejtpërdrejt ekzistencën e një familjeje, sulmi ndaj një qendre arsimore dëmton të drejtën për edukim e siguri, ndërsa fyerja e përfaqësive diplomatike dhe simboleve të tyre cënon rëndë rregullat e bashkëjetesës ndërkombëtare dhe respektit reciprok. Sipas Këshillit Ndërfetar, Shqipëria sot ka nevojë urgjente për më pak retorikë akuzuese dhe më shumë dëgjim të ndërsjellë, duke zëvendësuar përplasjet me përgjegjësinë qytetare. Asnjë palë nuk duhet ta shohë kundërshtarin si armik, pasi të gjithë janë pjesë e të njëjtit trung shoqëror me detyrime dhe të drejta të përbashkëta. Apeli përfundimtar u drejtohet të gjithë aktorëve: qytetarët të dëgjohen me vëmendje, institucionet të përgjigjen me vepra, ligji të zbatohet dhe paqja të mbrohet me çdo kusht. E ardhmja e vendit nuk mund të ngrihet mbi frikën dhe përçarjen, por mbi dinjitetin njerëzor dhe vullnetin e përbashkët për pajtim. Në fund, u bëhet thirrje e sinqertë të gjithë faktorëve që të lënë mënjanë interesat e ngushta, duke parapëlqyer dialogun mbi konfliktin dhe duke vënë në plan të parë sigurinë publike, mbrojtjen e qytetarëve dhe harmoninë shoqërore.