Sedloski pas humbjes ndaj Zvicrës: Një kundërshtar i këtij niveli nuk ka shkelur kurrë më parë në Shkup

Maqedonia e Veriut e ka nisur në mënyrën më të vështirë aventurën në Ligën e Kombeve, Divizioni B, duke u mposhtur thellë me rezultatin 0:3 në stadiumin e Shkupit nga përfaqësuesja e Zvicrës. Kjo disfatë shënon një statistikë shqetësuese për ekipin, pasi kjo është ndeshja e pestë me radhë ku skuadra nuk arrin të gjejë rrugën drejt rrjetës, që prej kohës kur Goce Sedloski mori drejtimin e stolit teknik. Pas përfundimit të takimit, trajneri Sedloski nuk ka kërkuar alibi, duke pranuar superioritetin e qartë të helvetëve dhe duke theksuar se ekipi i tij ka përpara një rrugë të gjatë për të bërë. “Zvicra e meritoi plotësisht këtë fitore. Ne jemi në një proces të rinovimit të kombëtares dhe po punojmë gradualisht në këtë drejtim. Fakti që nuk arritëm të regjistrojmë asnjë goditje në kuadratin e portës kundërshtare flet qartë për cilësinë e lartë që posedon kundërshtari,” u shpreh Sedloski pas ndeshjes. Duke analizuar forcën e kundërshtarit, tekniku maqedonas shtoi se Zvicra është ndoshta ekipi më i fortë që ka pasur mundësinë të përballet në Shkup. “Nuk ka luajtur kurrë më parë në Shkup një kombëtare më e mirë dhe më e fuqishme se Zvicra. Ata treguan dominim absolut në çdo segment të fushës,” përfundoi ai.