Breshëri raketa balistike godet pallatin presidencial në Jemen: Humbin jetën dy efektivë sigurie

Dy pjesëtarë të forcave të sigurisë kanë humbur jetën si pasojë e një sulmi me pesë raketa balistike që ka shënjestruar pallatin presidencial në qytetin port të Adenit, në jug të Jemenit, ku është vendosur selia e qeverisë së njohur ndërkombëtarisht. Ministri i Informacionit i Jemenit, Moammar al-Eryani, ka konfirmuar për BBC-në se kryeministri dhe anëtarët e kabinetit qeveritar kanë shpëtuar pa pësuar lëndime nga ky incident. Megjithatë, goditja e Pallatit al-Maashiq ka lënë të plagosur disa persona të tjerë. Nga ana tjetër, mediat nën kontrollin e rebelëve Huthi pretenduan se cak i këtij operacioni ishte një qendër e operacioneve ushtarake e drejtuar nga oficerë sauditë, si dhe disa depo armatimi. Ekzekutivi jemenas gëzon mbështetjen e një koalicioni ushtarak të drejtuar nga Arabia Saudite, i cili ofron mbështetje ajrore për trupat pro-qeveritare në luftën kundër rebelëve Huthi, të cilët mbështeten nga Irani. Ky sulm në Aden shënon një tjetër përshkallëzim të dhunës mes palëve ndërluftuese. Rebelët Huthi kanë intensifikuar goditjet me dronë dhe raketa ndaj infrastrukturës energjetike, aeroporteve dhe bazave ushtarake në Arabinë Saudite, duke i konsideruar ato si kundërpërgjigje ndaj sulmeve në territoret nën kontrollin e tyre në Jemenin perëndimor, përfshirë edhe kryeqytetin Sanaa. Kujtojmë se vetëm të shtunën, 13 persona mbetën të vrarë nga një sulm me raketa i ndërmarrë nga rebelët Huthi në drejtim të aeroportit ndërkombëtar në Riad të Arabisë Saudite.