Pushteti Lokal: Intensifikohen takimet për Strategjinë e re 2027–2031

Ministria e Administrimit të Pushtetit Lokal (MAPL) ka intensifikuar takimet konsultative me autoritetet komunale dhe partnerët ndërkombëtarë, në kuadër të procesit për hartimin e Strategjisë së Vetëqeverisjes Lokale 2027–2031. Në kuadër të këtij cikli diskutimesh, zëvendësministri Agon Batusha, në bashkëpunim me krerët e komunave dhe zyrtarë të Misionit të OSBE-së, ka shqyrtuar çështjet kyçe për zhvillimin e pushtetit lokal. Vëmendje e veçantë iu kushtua konsolidimit të demokracisë në nivel lokal, ngritjes së standardeve të transparencës, forcimit të llogaridhënies, si dhe nxitjes së qasjes gjithëpërfshirëse dhe ngritjes së performancës së administratave komunale. Gjatë këtij takimi pune u nënvizua nevoja që ky dokument strategjik të pasqyrojë sfidat dhe kërkesat reale të secilës komunë. Për këtë qëllim, u diskutua mbi përcaktimin e objektivave të matshme, ndërmarrjen e hapave konkretë dhe vendosjen e mekanizmave funksionalë për implementimin e tyre. Po ashtu, u vu theksi te domosdoshmëria e investimit në ngritjen e kapaciteteve institucionale e profesionale, si dhe te nxitja e përfshirjes më të madhe qytetare në vendimmarrje. Projekti për Strategjinë e Vetëqeverisjes Lokale 2027–2031 synon të ndërtojë një themel afatgjatë për një administrim vendor më të hapur, llogaridhënës dhe funksional, i cili i përgjigjet më mirë kërkesave të qytetarëve për shërbime cilësore publike. Nga ana e saj, MAPL ka konfirmuar angazhimin e palëkundur për të garantuar një proces gjithëpërfshirës dhe transparent, duke bashkëpunuar ngushtë me komunat dhe akterët ndërkombëtarë për të siguruar politika zhvillimore që fuqizojnë realisht qeverisjen lokale në vend.