Tensione dhe dhunë në rrugë, Niko Peleshi shtyn seancën plenare dhe jep alarmin për sigurinë kombëtare

Kryetari i Kuvendit të Shqipërisë, Niko Peleshi, ka ndërhyrë pas tre ditësh protestash të tensionuara në vend, duke marrë vendimin për të shtyrë me një javë seancën e Kuvendit që ishte caktuar të mbahej sot. Reagimi i tij vjen si pasojë e zhvillimeve shqetësuese dhe ngjarjeve të dhunshme që kanë prekur institucionet shtetërore, pronën publike dhe atë private. Nëpërmjet një komunikimi zyrtar, Peleshi ka vlerësuar se gjendja aktuale paraqet rreziqe serioze për rendin publik, duke u mbështetur edhe në të dhënat e organeve ligjzbatuese mbi skenarë destabilizues. Sipas kreut të Kuvendit, shtyrja e seancës bëhet me qëllim që çdo deputet të ketë kushtet e duhura për të ushtruar mandatin e tij në një mjedis të sigurt. “Me përgjegjësinë për të garantuar një seancë të qetë, ku çdo deputet të ketë hapësirën kushtetuese dhe ligjore për të ushtruar detyrën e tij shtetërore, përballë një situate të paprecedentë dhune ndaj institucioneve të shtetit, pronës publike dhe pasurisë private të qytetarëve, vendosa ta shtyj me një javë seancën plenare të planifikuar për sot”, deklaroi Peleshi. Kryeparlamentari shpjegoi se ky hap ka për qëllim parandalimin e çdo veprimi që mund të nxisë më tej përplasjet. Ai u drejtua me një thirrje publike aktorëve politikë, botës akademike, komunitetit të biznesit, shoqërisë civile dhe mbarë qytetarëve që të tregojnë maturi dhe të mbrojnë stabilitetin. “Sot është dita kur çdo shtetar, çdo parti politike, çdo organizatë jofitimprurëse, përfaqësuesit e elitës akademike dhe të biznesit, dhe çdo qytetar i denjë i këtij vendi duhet t’i thërrasë arsyes dhe instinktit tonë kombëtar për paqe”, u shpreh ai. Një vëmendje të veçantë në mesazhin e tij, Peleshi i kushtoi përfshirjes së të rinjve dhe nxënësve të shkollave në këto protesta. Ai bëri thirrje që të miturit të mbahen larg akteve të dhunës, duke shtuar se ndonëse protestat dhe kërkesat e të rinjve janë të ligjshme, ata nuk duhet të bien pre e manipulimeve. “Ata nuk duhet të ushqehen me urrejtje. Ata nuk duhet të formohen nga dhuna e rrugës. Ata nuk duhet të lihen në duart e forcave të errëta, me qëllime aspak shqiptare”, theksoi Peleshi. Lidhur me procesin e integrimit europian, kryetari i Kuvendit paralajmëroi se paqëndrueshmëria dhe dhuna mund të dëmtojnë rëndë pozitat e Shqipërisë në rrugën drejt Bashkimit Europian, në një kohë kur konteksti gjeopolitik rajonal është tejet delikat. “Ky proces mund të pengohet nga forca malinje, por kurrsesi nuk duhet të pengohet, as të prishet, nga vetë ne, shqiptarët modernë të shekullit XXI”, u shpreh ai. Në mbyllje të deklaratës, kryetari i Kuvendit, Niko Peleshi, ftoi të gjitha palët që t'i japin hapësirë dialogut dhe të lënë mënjanë përplasjet, duke kujtuar se interesi i përbashkët kombëtar mbetet mbi çdo dallim politik. “Të ulemi. Të flasim. Të diskutojmë dhe të debatojmë për të ardhmen, pa harruar kurrë se, mbi të gjitha, jemi të gjithë shqiptarë”, përfundoi ai.